Հայաստանի տնտեսության աճը 2025թ․–ին կկազմի 5% և կարագանա մինչև 5,5% 2026թ․–ին․ ԱՄՀ կանխատեսում

ԵՐԵՎԱՆ, 4 դեկտեմբերի․/ԱՌԿԱ/․ Արժույթի միջազգային հիմնադրամը (ԱՄՀ) ակնկալում է, որ Հայաստանի տնտեսական աճը կմնա բարձր՝ 2025 թվականին հասնելով 5%-ի, իսկ 2026 թվականին՝ 5.5%-ի։

«Հայաստանի տնտեսական ցուցանիշները մնում են բարձր, չնայած մի շարք ցնցումներին համաշխարհային իրավիճակի անորոշության ֆոնին ։ Իշխանությունների ճկուն քաղաքականության և աշխատուժի ու կապիտալի անսպասելի ներհոսքի շնորհիվ, վերջին երեք տարիների ընթացքում իրական ՀՆԱ-ն տարեկան աճել է միջինը 8.9%-ով», - ասվում է ԱՄՀ գործադիր խորհրդի նիստի արդյունքում հրապարակված մամուլի հաղորդագրության մեջ, որի ընթացքում հաստատվել է Հայաստանի համար նախատեսված նոր եռամյա SBA ծրագիրը։

Նշվում է, որ տնտեսական հեռանկարները մնում են դրական. կայուն աճը և գնաճը մոտենում են Կենտրոնական բանկի թիրախային ցուցանիշին։

«Կշռադատված քաղաքականության շարունակական իրականացումը և բարեփոխումների արագացումը վճռորոշ նշանակություն կունենան կայունության հետագա ամրապնդման և առաջիկա ժամանակահատվածում ներառական ու կայուն աճի ապահովման համար», - ասվում է հաղորդագրության մեջ։

Ինչպես նշել է ԱՄՀ կառավարիչ տնօրենի տեղակալ և նախագահի պաշտոնակատար Բո Լին, վերջին տարիներին Հայաստանը հաջողությամբ հաղթահարել է բազմաթիվ մարտահրավերներ՝ միաժամանակ պահպանելով մակրոտնտեսական և ֆինանսական կայունությունը։

«Պահուստային վարկավորման գործող համաձայնագրի (SBA) շրջանակում արդյունքները բարձր էին։ Հետագա զգուշավորությունը քաղաքականության մեջ և բարեփոխումների արագացումը, որոնք ամրապնդված են SBA հաջորդ համաձայնագրով, որը իշխանությունները մտադիր են դիտարկել որպես նախազգուշական միջոց, կարևոր կլինեն կայունության հետագա բարձրացման և ներառական ու կայուն աճի ապահովման համար», - ընդգծել է նա։

ԱՄՀ գործադիր խորհուրդը դեկտեմբերի 3-ին հաստատել է Հայաստանի հետ Stand-By Arrangement (SBA) ձևաչափով նոր 36-ամսյա համաձայնագիրը 128.8 մլն SDR չափով (Հայաստանի քվոտայի 100%-ը ԱՄՀ-ում, կամ մոտ $175 մլն): Հայաստանին անհապաղ հասանելի կդառնա 18.4 մլն SDR-ին (մոտ $25 մլն) համարժեք գումար։ Մնացած գումարը կտրամադրվի հավասար տրանշերով՝ հաշվի առնելով վեց կիսամյակային ակնարկները։ Հայաստանի իշխանությունները հայտարարել են, որ մտադիր են այս պայմանավորվածությունը դիտարկել որպես նախազգուշական միջոց։ Նախորդ եռամյա SBA համաձայնագիրը հաստատվել էր 2022 թվականի դեկտեմբերի 12-ին, և դրա ժամկետն ավարտվում է 2025 թվականի դեկտեմբերի 11-ին։

Հայաստանի տնտեսության ցուցանիշներն ու կանխատեսումները

Հայաստանի տնտեսական աճը 2025 թվականի պետբյուջեով նախատեսված է 5.1%-ի չափով։ ՀՀ ԿԲ ընթացիկ տարվա երրորդ եռամսյակի դրամավարկային քաղաքականության հաշվետվության համաձայն՝ 2025 թվականի արդյունքներով Հայաստանի ՀՆԱ-ի աճը, կախված սցենարից (Ա-Բ), ակնկալվում է 5.8-5.7%, 2026 թվականին՝ 5.7-6.2%, 2027 թվականին՝ 5-6.3%։ 

ԵԱԶԲ-ն 2025թ․–ին ՀՆԱ–ի աճը կանխատեսում է 5.5%։ ՀԲ-ն ակնկալում է, որ Հայաստանի տնտեսությունը 2025 թվականին կաճի 5.2%-ով, ԱՄՀ-ն՝ 5%-ով, ՎԶԵԲ-ը՝ 5%-ով, ԱԶԲ-ն՝ 6%-ով։ Fitch Ratings գործակալության կանխատեսումների համաձայն՝ Հայաստանի տնտեսական աճը 2025 թվականին կկազմի 4.9%, իսկ ՄԱԿ-ը ակնկալում է, որ հայկական տնտեսությունը 2025 թվականին կաճի 5.2%-ով։