Հայաստանի տնտեսության կայուն աճը կախված կլինի մի շարք ոլորտներում կառավարության հասցեական քաղաքականության արդյունավետությունից․ ԿԲ
ԵՐԵՎԱՆ, 27 հոկտեմբերի․/ԱՌԿԱ/․ Նախորդ տարիների տնտեսական աճի կարճաժամկետ գործոնների ազդեցությունն աստիճանաբար չեզոքանում է, այդ պատճառով կայուն տնտեսական աճի ներուժի ապահովումը զգալիորեն կախված կլինի ՀՀ կառավարության կողմից արտադրողականության բարձրացմանը, արտահանման խթանմանը և ներդրումային միջավայրի բարելավմանն ուղղված հասցեական քաղաքականության արդյունքներից։
Այս մասին հայտարարեց ՀՀ ԿԲ նախագահ Մարտին Գալստյանը ԱԺ–ում 2026թ․–ի պետբյուջեի նախագծի քննարկման ժամանակ։
Այս կապակցությամբ նա կարևորեց կապիտալ ծախսերի դերն ու հետևողական ավելացումը, ինչը վերաբերում է տնտեսական և ենթակառուցվածքյին զարգացմանն ուղղված ծրագրերի լիարժեք և արդյունավետ իրագործմանը։
«2026թ․–ին հարկաբյուջետային քաղաքականությունը կառաջնորդվի տնտեսության 5,4%-անոց աճի ապահովմամբ՝ հարկաբյուջետային համախմբման և պարտքի ապահովման, ինչպես նաև վերջին տարիներին ձևավորված տնտեսական ներուժի բարձր մակարդակի պահպանման շեշտադրմամբ», – ասաց Գալստյանը։
ԿԲ նախագահը նշեց նաև արտաքին և ներքին բարձր ռիսկերը զգալի աշխարհաքաղաքական և տնտեսական անկայունության պայմաններում, որը վերաբերում է գործոնների կայունությանը տնտեսական ներուժի և տնտեսական հեռանկարների հնարավոր սցենարների համար։
Ռիսկերի կառավարման արդյունավետության տեսակետից նա անհրաժեշտ համարեց պահուստային ֆոնդերի օգտագործման խիստ սահմանափակումը։
«Ռիսկերի և տնտեսության աճի հեռանկարների համար անորոշության համատեքստում առանցքային գործոնը 2026թ․–ին հարկային բարեփոխումների արդյունավետության և հետևողականության ապահովումն է», – ավելացրեց Գալստյանը։
ԿԲ նախագահի խոսքով, կապիտալ ծախսերում տնտեսական ենթակառուցվածքների ամրապնդման վրա արվող հիմնական շեշտը կդառնա խթան տնտեսության ներուժի և արտադրողականության համար և հիմքեր կստեղծի նախատեսված տնտեսական ծրագրերի իրականացման համար։
Հայաստանի կառավարությունը 2025 թվականի սեպտեմբերի 25-ին հաստատեց երկրի 2026 թվականի պետական բյուջեի նախագիծը։ Փաստաթղթում ՀՆԱ-ի աճն ամրագրված է 5.4%, եկամուտները՝ 3.9 տրիլիոն դրամ, ծախսերը՝ 3.6 տրիլիոն դրամ, պակասուրդը կկազմի 537 միլիարդ դրամ կամ ՀՆԱ-ի 4.5%-ը ($1 – 383.05 դրամ)։
