Հայաստանի տնտեսությունն ամեն տարի լրացուցիչ ստանալու է 16,4 մլրդ դրամ Ադրբեջանից վառելիքի մատակարարման հաշվին․ Պապոյան

ԵՐԵՎԱՆ, 12 հունվարի․/ԱՌԿԱ/․ Ադրբեջանից Հայաստան ապրանքների մատակարարումն արդեն կարելի է դիտարկել որպես կայուն գործընթաց, Հանրային հեռուստաընկերության եթերում հայտարարել է ՀՀ էկոնոմիկայի նախարար Գևորգ Պապոյանը։

«Այս անգամ Հայաստան է ներկրվում ոչ միայն Premium, այլև Regular տեսակի բենզին: Մատակարարման ծավալները կազմում են շուրջ 6-7 հազար տոննա, մինչդեռ նախկինում խոսքը 1,2-1,3 հազար տոննայի մասին էր: Մեր գնահատականներով՝ այս և այլ ուղեկցող փոփոխությունները կհանգեցնեն նրան, որ բենզինի և դիզելային վառելիքի դեկտեմբերյան գները կնվազեն միջինը մոտ 80 դրամով», - նշել է նա:

Պապոյանը հավելել է, որ այլ երկրներից բենզին և դիզելային վառելիք ներկրողները նույնպես նախաձեռնել են իրենց մատակարարների մոտ մեծածախ գների նվազեցում:

«Ադրբեջանի հետ հաստատված խաղաղության օգուտները, իհարկե, բազմաթիվ են: Սակայն տեսանելի օգուտներից մեկն այն է, որ մեր տնտեսությունն ամեն տարի փաստացի լրացուցիչ ստանալու է 16,4 մլրդ դրամ (շուրջ 43 մլն դոլար): Սա այն գումարն է, որով կկրճատվեն մեր ծախսերը: Մասնավորապես, ֆերմերները գարնանային դաշտային աշխատանքների ժամանակ կկարողանան դիզելային վառելիքի ձեռքբերման ծախսերը կրճատել մոտ 1,1 մլրդ դրամով... Այսպիսով, մենք այս գումարի չափով լցնում ենք Հայաստանի պետբյուջեն և մեր քաղաքացիների ընտանեկան բյուջեները: Չէ՞ որ նախկինում մեզ մեղադրում էին Ադրբեջանի բյուջեն լցնելու մեջ», - հայտարարել է նախարարը:

Մեկնաբանելով ադրբեջանական նավթամթերքի մատակարարումներից հայկական շուկայի հնարավոր կախվածության վերաբերյալ մտահոգությունները՝ Պապոյանը նշել է, որ նման ռիսկեր չի տեսնում: Նրա խոսքով՝ մատակարարման ծավալները միակողմանի կախվածության վտանգ չեն ստեղծում, իսկ Հայաստանը կշարունակի վառելիք ներկրել տարբեր երկրներից, այդ թվում՝ Ռումինիայից, Վրաստանից, Ռուսաստանից և Եգիպտոսից:

Նախարարը նաև ընդգծել է, որ այլընտրանքային երթուղիների և ներկրման աղբյուրների ընդլայնումը նպաստում է ներքին շուկայում գների նվազմանը և տնտեսության մրցունակության բարձրացմանը:

Նրա խոսքով՝ Հայաստանի իշխանությունները փորձում են հաղթահարել այնպիսի սահմանափակումներ, ինչպիսիք են, օրինակ, փակ սահմանները, ինչը թույլ կտա հասնել թե՛ ներկրվող ապրանքների էժանացմանը, թե՛ արտահանվող արտադրանքի ինքնարժեքի նվազեցմանը՝ բարձրացնելով դրա մրցունակությունը:

Ավելի վաղ Պապոյանը հայտարարել էր, որ 2026 թվականի հունվարի 8-ի դրությամբ Ադրբեջանի տարածքով երկաթուղով Հայաստան է ներկրվել 8 485 տոննա ռուսական հացահատիկ, ևս 4 103 տոննա ճանապարհին է: Նաև ճանապարհին է գտնվում 7 600 տոննա ադրբեջանական նավթամթերք (բենզին և դիզելային վառելիք):