Հայաստանն ու Ղազախստանը քննարկում են տնտեսական համագործակցության զարգացումը
ԵՐԵՎԱՆ, 30 մայիսի․/ԱՌԿԱ/․ Էկոնոմիկայի նախարար Գևորգ Պապոյանը Ղազախստանի առևտրի և ինտեգրացիայի նախարարի հետ քննարկել է համագործակցությանը վերաբերող հարցեր դեղագործության, թանկարժեք քարերի ու մետաղների արտահանման ոլորտներում։
Պապոյանը Ղազախստանի Հանրապետության առևտրի և ինտեգրացիայի նախարար Արման Շաքքալիևի հետ հանդիպել է Աստանա միջազգային համաժողովի շրջանակում։
Պապոյանն ընդգծել է երկու երկրների միջև տնտեսական փոխգործակցության ընդլայնման, առևտրաշրջանառության ավելացման կարևորությունը։
«Հայաստանը Ղազախստանի Հանրապետությունը համարում է տարածաշրջանում հուսալի և խոստումնալից գործընկեր: Մենք համոզված ենք, որ մեր երկրների միջև առևտրատնտեսական համագործակցության զարգացումը կարող է զգալի ներդրում ունենալ ամբողջ եվրասիական տարածքի կայունության և բարեկեցության ամրապնդման գործում», - նշել է Պապոյանը։
Իր խոսքում Պապոյանը կարևորել է փոխգործակցության խորացումը հատկապես դեղագործության, և թանկարժեք քարերի ու մետաղների արտահանման ուղղությամբ։
Անդրադառնալով գյուղատնտեսության ոլորտում երկկողմ համագործակցությանը՝ ՀՀ էկոնոմիկայի նախարարը նշել է, որ Հայաստանը հետաքրքրված է հայկական ագրոարդյունաբերական համալիրի արտադրանքի արտահանման ավելացմամբ, ինչպես նաև Ղազախստանից բարձրարժեք տոհմային կենդանիների ներմուծմամբ։
Հանդիպման ընթացքում Պապոյանը ներկայացրել է նաև Հայաստանի բարենպաստ ներդրումային և գործարար միջավայրը, ինչպես նաև ՀՀ կառավարության «Խաղաղության խաչմերուկ» նախագիծը, որի շրջանակներում Հայաստանը կարող է դիտարկվել որպես կայուն փոխգործակցության, լոգիստիկայի, առևտրի և մարդասիրական գործընկերության հարթակ՝ միավորելով Արևելքն ու Արևմուտքը, Հյուսիսն ու Հարավը։
