Հայաստանն ու Թուրքիան պայմանավորվել են ավելացնել թռիչքների քանակը․ Միրզոյան
ԵՐԵՎԱՆ, 5 նոյեմբերի․/ԱՌԿԱ/․ Պայմանավորվածություն կա ավելացնել թռիչքները դեպի Երևան, դեպի Գյումրի և ըստ այդմ՝ Թուրքիայի քաղաքներ՝ Ստամբուլ, ենթադրում եմ՝ Անկարա և այլն, հայտարարել է ՀՀ ԱԳ նախարար Արարատ Միրզոյանը «Օրբելի ֆորում. կառուցելով խաղաղություն և բազմակողմանի համագործակցություն» խորագիրը կրող միջազգային համաժողովի ընթացքում։
Նախարարի խոսքով, տասնամյակներով փակ սահմանների պարագայում մարդիկ գնացել են այցելել են իրար, առևտուր է եղել շատ շոշափելի, խնդիրն այն է եղել, որ այդ առևտուրը երրորդ երկրով է անցել: Թռիչքներ են եղել և այսօր էլ կան։
Միրզոյանը նաև ընդգծել է, որ Թուրքիայի հետ Հայաստանի երկխոսությունը կամ Թուրքիայի հետ Հայաստանի հարաբերությունները հայելային հակապատկերն են Ադրբեջանի հետ եղած իրավիճակին:
«Հիմա կարող եմ ուրախությամբ փաստել, որ Թուրքիայի հետ հաստատվել է ինտենսիվ երկխոսություն, անցկացվում են կանոնավոր հանդիպումներ, տեղի է ունեցել ՀՀ վարչապետի այցը, ես մասնակցում եմ Անթալիայի համաժողովին և այլ հարթակներին», – ավելացրել է նա։
