Հայաստանում բանջարաբոստանային մշակաբույսերի համախառն բերքը 2013թ.–ին 860–865 հազար տոննա կկազմի. Գյուղատնտեսության նախարարություն

ԵՐԵՎԱՆ, 30 սեպտեմբերի. /ԱՌԿԱ/. ՀՀ գյուղատնտեսության նախարարության օպերատիվ տվյալների համաձայն, բանջարաբոստանային մշակաբույսերի բերքը 2013թ.–ին կկազմի 860–865 հազար տոննա, երկուշաբթի լրագրողներին տեղեկացրեց գերատեսչության ղեկավարի տեղակալ Սամվել Գալստյանը։

«Տվյալ ցուցանիշը 11–16 հազար տոննայով գերազանցում է անցյալ տարվա ցուցանիշը, երբ բերքը կազմում էր 849 հազար տոննա»,– ասաց նա` ավելացնելով, որ ընթացիկ տարվա սեպտեմբերի 30–ի դրությամբ բանջարաբոստանային մշակաբույսերի բերքն արդեն հասել է 750 հազար տոննայի։

Տեղեկացնելով, որ նշված ժամանակահատվածում բոստանային մշակաբույսերի բերքը կազմել է 190 հազար տոննա` Գալստյանը միաժամանակ ասաց, որ բոստանային մշակաբույսերի համախառն բերքը տարեվերջին կկազմի 208–2010 հազար տոննա` 2012թ.–ի 205 հազար տոննայի դիմաց։

«Տարվա արդյունքներով 660–665 հազար տոննա կարտոֆիլ կհավաքվի` անցյալ տարվա 647 հազար տոննայի դիմաց»,– ասաց նա` ավելացնելով, որ սեպտեմբեր 30–ի դրությամբ կարտոֆիլի բերքը կազմել է 475 հազար տոննա։

Բացի այդ, սեպտեմբերի 30–ի դրությամբ, լոլիկի բերքը կազմել է 230 հազար տոննա` անցյալ տարվա նույն ժամանակահատվածի 265 հազար տոննայի դիմաց։

Սեպտեմբերի 27–ի դրությամբ լոլիկի մթերման ծավալը կազմել է 13,324 տոննա` անցյալ տարվա 26,229 տոննայի դիմաց։ Գալստյանը պարզաբանեց, որ ընթացիկ տարում բերքի և լոլիկի մթերումների ծավալի նվազման պատճառը հիմնականում մայիսին գրանցված կարկտահարությունն է եղել։ –0–