ՀՀ կառավարությունը երկրի տնտեսական աճի պոտենցիալը գնահատում է 5–5,5%․ Գալստյան

ԵՐԵՎԱՆ, 2 նոյեմբերի. /ԱՌԿԱ/. Հայաստանի կառավարության գնահատմամբ՝ երկրի տնտեսական աճի պոտենցիալը վերջին տարիներին ավելացել է և կազմում է 5–5,5%, խորհրդարանում Հայաստանի 2027 թ.-ի պետական բյուջեի նախագծի վերաբերյալ կարգավորող մարմնի եզրակացությունը ներկայացնելիս հայտարարել է ՀՀ Կենտրոնական բանկի նախագահ Մարտին Գալստյանը։

Ընդ որում, նա նշել է, որ նախորդ տարիներին բարձր տնտեսական աճին նպաստած մի շարք կարճաժամկետ գործոնների ազդեցության աստիճանական չեզոքացման պայմաններում կայուն և բարձր տնտեսական աճի պահպանումն էապես կախված կլինի արտադրողականության բարձրացմանը, արտահանման և մասնավոր ներդրումների խթանմանը, ինչպես նաև ներդրումային միջավայրի բարելավմանն ուղղված քաղաքականությունների արդյունավետ իրականացումից։

ԿԲ ղեկավարի խոսքով՝ բյուջեի նախագծով նախատեսված հարկաբյուջետային քաղաքականությունն ուղղված է Հայաստանի մրցունակության և տնտեսության դիմակայունության ամրապնդմանը, տնտեսական ու անվտանգային ենթակառուցվածքներում, ինչպես նաև մարդկային և ֆիզիկական կապիտալում ներդրումների բարձր մակարդակի պահպանմանը։

Գալստյանը նշել է, որ 2027 թ.-ին հարկաբյուջետային քաղաքականությունը միտված է լինելու 5,8% մակարդակում տնտեսական աճի ապահովմանը։

Միևնույն ժամանակ նախատեսվում է հարկաբյուջետային համախմբման շարունակում և պարտքի կայունության ամրապնդում՝ մարդկային կապիտալի զարգացմանն ու երկրի տնտեսական պոտենցիալի հետագա ընդլայնմանն ուղղված միջոցառումների իրականացմանը զուգահեռ։

Ֆինանսների նախարարության կողմից հրապարակված Հայաստանի 2027 թ.-ի պետական բյուջեի նախագծի համաձայն՝ ընդհանուր ծախսերը ծրագրված են 4,07 տրիլիոն դրամի չափով, եկամուտները՝ 3,60 տրիլիոն դրամի, իսկ պակասուրդը՝ 468,2 միլիարդ դրամի չափով։