Հունվար-հուլիս ամիսներին ՀՀ-ի պետական բյուջեի պակասուրդը կազմել է կանխատեսված ՀՆԱ-ի 0.6%-ը. Համաշխարհային բանկ
ԵՐԵՎԱՆ, 30 սեպտեմբեր․/ԱՌԿԱ/. Համաշխարհային բանկի «Հայաստանի ամսական տնտեսական զարգացում – սեպտեմբեր 2025» զեկույցի համաձայն՝ հունվար-հուլիս ժամանակահատվածում Հայաստանի պետական բյուջեի ընդհանուր պակասուրդը կազմել է տարեկան կանխատեսվող ՀՆԱ-ի 0.6%-ը։
Նշվում է, որ հուլիսին բյուջեում գրանցվել է տարեկան կանխատեսվող ՀՆԱ-ի 0.2%-ի չափով պակասուրդ։
«Հարկային եկամուտները (այդ թվում՝ հիփոթեքի հետ կապված եկամտային հարկը) անվանական արտահայտությամբ աճեցին 18.1 տոկոսով (տ/տ), որը պայմանավորված էր ԱԱՀ -ի հավաքագրման ավելի բարձր մակարդակով (աճը՝ 20.7 տոկոս, տ/տ), եկամտային հարկերով (աճը՝ 14 տոկոս, տ/տ) և շահութահարկերով (աճը՝ 46.7 տոկոս, տ/տ)», - նշվում է զեկույցում։
Զեկույցի համաձայն՝ ընդհանուր ծախսերը կրճատվել են 4.8%-ով։
«Սա պայմանավորված էր 42.7 տոկոսով (տ/տ) կապիտալ ծախսերի անկմամբ, ինչը պաշտպանական ծախսերի 39.1 տոկոսով (տ/տ) նվազման հետևանք էր։ Հատկանշական է, որ կրթական ծախսերն աճեցին 19.7 տոկոսով (տ/տ)՝ պայմանավորված Կառավարության հնգամյա (2021–2026 թթ.) ծրագրով նախատեսված դպրոցաշինությամբ և դպրոցների հիմնանորոգմամբ։ Ընթացիկ ծախսերն ավելացան 4.7 տոկոսով (տ/տ)՝ հիմնականում սուբսիդիաներով պայմանավորված (աճը՝ 21.3 տոկոս, տ/տ)»,-նշվում է զեկույցում։
ՀՀ ֆինանսների նախարարության տվյալներով՝ 2025 թ.-ի առաջին կիսամյակի պետական բյուջեն կատարվել է 39.2 մլրդ դրամ պակասուրդով՝ նախատեսված 325.3 մլրդ դրամ պակասուրդի դիմաց։ Հաշվետու ժամանակահատվածում պետական բյուջեի եկամուտները կազմել են 1,433.1 մլրդ դրամ կամ վերանայված բյուջեի 102.2%-ը (նախորդ տարվա նույն ժամանակահատվածի համեմատ 15.2%-ով ավելի), իսկ ծախսերը՝ 1,472.3 մլրդ դրամ կամ նախատեսված ծավալի 85.2%-ը (19.4%-ով ավելի)։
Այս տարվա սեպտեմբերին ՀՀ ֆինանսների նախարար Վահե Հովհաննիսյանը հայտարարել է պետական բյուջեի պակասուրդը 2026 թ.-ին 5.5%-ից մինչև 4.5% և, վերջնական արդյունքում, 2030 թ.-ին մինչև 1% աստիճանաբար կրճատելու ծրագրերի մասին։ ($1 = 382.75 դրամ)
