Ինչպես են նավթի համաշխարհային գներն ազդում Հայաստանում բենզինի գների վրա․ մեկնաբանում է ԿԲ նախագահը

ԵՐԵՎԱՆ, 15 սեպտեմբերի․/ԱՌԿԱ/․ Հայաստանի ԿԲ նախագահ Մարտին Գալստյանը հայտարարել է, որ մոտ ապագայում չպետք է ակնկալել նավթի համաշխարհային գների էական վերադարձ նախկին մակարդակներին:

«Նավթի համաշխարհային գների աճը էական գործոն է Հայաստանում սպառողական գների համար՝ հաշվի առնելով սպառողական զամբյուղում բենզինի տեսակարար կշիռը»,- հայտարարել է նա երեքշաբթի կայացած ասուլիսի ժամանակ:

ՀՀ ԿԲ-ի ներկայացրած տվյալների համաձայն՝ 2026 թվականի մարտից Հորմուզի նեղուցով անցնող տանկերների թիվը կտրուկ կրճատվել է՝ հասնելով գրեթե զրոյի: Այս ֆոնին Brent տեսակի նավթի գինը, որը նախկինում հիմնականում գտնվում էր մեկ բարելի դիմաց $60–70 միջակայքում, սկսել է աճել և հաջորդող ամիսներին էական տատանումներով բարձրացել է մինչև շուրջ $120՝ մեկ բարելի դիմաց: Սեպտեմբերին նավթի գնանշումները նորից մոտեցել են $100-ին՝ մեկ բարելի դիմաց, և վերջին օրերին ցուցադրում են աճի միտում:

«ԱՄՆ-ն ուներ նավթի ռազմավարական պաշարների մոտավորապես 700 մլն բարել (ըստ ԿԲ տվյալների՝ 2012 թվականի դրությամբ, խմբ.), այսօր նրանց ռազմավարական պաշարները գտնվում են շուրջ 300 մլն [բարելի] մակարդակում: Սա ազդելու է նավթի գների վրա»,- ասել է Գալստյանը՝ պատասխանելով «ԱՌԿԱ» գործակալության հարցին:

ԿԲ նախագահի խոսքով՝ Մերձավոր Արևելքում տիրող իրավիճակը կհանգեցնի նրան, որ մոտ ապագայում նավթի գների էական վերադարձը նախկին մակարդակներին հնարավոր չէ ակնկալել:

Խոսելով Հայաստանում սպառողական գների վրա այս իրավիճակի ազդեցության մասին՝ Գալստյանը նշել է, որ սպառողական զամբյուղում բենզինի տեսակարար կշիռը կազմում է շուրջ 5%:

«Բենզինի գինը հասել է 586–600 [դրամի՝ 1 լիտրի դիմաց] մակարդակի, ինչը էապես տարբերվում է նույնիսկ մի քանի ամիս առաջվա մակարդակից: Ուստի սա էական գործոն է»,- ասել է նա:

Ազգային վիճակագրական կոմիտեի տվյալներով՝ Հայաստանում բենզինը 2026 թվականի օգոստոսին, 2025 թվականի օգոստոսի համեմատ, թանկացել է 11,7%-ով, իսկ դիզելային վառելիքը՝ 25%-ով: Մեկ ամսվա ընթացքում բենզինի գներն աճել են 4,1%-ով, իսկ դիզելային վառելիքինը՝ 9,8%-ով: