Իրանական պոլիմերային հումքի ներկրումը Հայաստան դադարեցվել է՝ Իրանի կողմից 52 անուն ապրանքատեսակի արտահանումը դադարեցնելու պատճառով

ԵՐԵՎԱՆ, 6 նոյեմբերի. /ԱՌԿԱ/. Իրանի Իսլամական Հանրապետությունը  դադարեցրել է 52 անվանում ապրանքատեսակների արտահանումը արտերկիր, որի պատճառով շուրջ երկու շաբաթ ընդհատվել է պոլիմերային հումքի ( պոլիէթիլեն, պոլիպրոպիլեն, պոլիստիրոլ ) ներկրումը Հայաստան, հաղորդում է Հայաստանի արդյունաբերողների և գործարարների (գործատուների ) միության մամուլի ծառայությունը:

«Դա կարող է խիստ բացասաբար անդրադառնալ հատկապես սննդարդյունաբերության և գյուղատնտեսության ոլորտների վրա»,- նշվում է հաղորդագրության մեջ:

Այլ երկրներից հումքի ներկրումը ապահովելու համար կպահանջվի առնվազն 30–40 օր և բնականաբար ավելի թանկ գնով, ինչը կբերի նաև ապրանքների գնաճի։ 

Հայաստանի արդյունաբերողների և գործարարների (գործատուների ) միությունը դիմել է ՀՀ վարչապետ Տիգրան Սարգսյանին՝ խնդրելով նրա միջամտությունը  առաջացած խնդիրը Իրանի համապատասխան մարմինների հետ լուծելու նպատակով։ -0-