ՀՀ կառավարությունը լրացուցիչ 10 մլրդ դրամ կհատկացնի գյուղատնտեսության արտոնյալ վարկավորման համար

ԵՐԵՎԱՆ, 14 մայիսի. /ԱՌԿԱ/. Հայաստանի կառավարությունը լրացուցիչ 10 մլրդ դրամ կհատկացնի գյուղատնտեսության արտոնյալ վարկավորման համար, հինգշաբթի կառավարության նիստի ընթացքում ասաց ՀՀ վարչապետ Հովիկ Աբրահամյանը։

Ւնչպես նշեց վարչապետը, գյուղատնտեսական արտոնյալ վարկերի տրամադրման` կառավարության կողմից նախատեսված ծրագրի շրջանակում նախատեսվում է սուբսիդավորել տարեկան 14 տոկոսի 6 տոկոսը։ Արդյունքում, ֆերմերները հնարավորություն են ստանում ստանալ գյուղատնտեսական վարկեր տարեկան 8 տոկոսով։

Նա նշեց, որ ԿԲ–ն զգում է միջոցների պակաս ծրագրի հաջող իրագործման համար, ինչի կապակցությամբ ՀՀ նախագահի հետ նախօրեին տեղի ունեցած քննարկման արդյունքում որոշվել է լրացուցիչ ֆինանսավորում տրամադրել ծրագրի համար։

«Նախատեսվում է, որ 2015 թ.–ին գյուղատնտեսության արտոնյալ վարկավորման համար պետբյուջեից կհատկացվի լրացուցիչ 10 մլրդ դրամ, որից 3 մլրդ դրամը կտրամադրվի 2015 թ.–ի մայիսին, իսկ մնացած միջոցները` 7 մլրդ դրամը` մինչև տարեվերջ», – ասաց Աբրահամյանը։

Նրա խոսքերով` միջոցները կտրամադրվեն Կենտրոնական բանկին, որպեսզի այն հերթին գումար տրամադրի այդ ծրագրով զբաղվող բանկերին։ Նախատեսվում է, որ միջոցները կտրամադրվեն երկու տարի ժամկետով` տարեկան 3% տոկոսադրույքով։

2014 թ.–ի վերջի դրությամբ Հայաստանի ֆերմերական տնտեսությունների մոտ 80 հազարը ստացել են 66 մլրդ դրամի արտոնյալ գյուղատնտեսական վարկեր։

Կառավարության որոշմամբ՝ 2011թ.-ի ապրիլի 1-ից հայ գյուղացիներին տարեկան 14 տոկոս դրույքով արտոնյալ գյուղատնտեսական վարկեր են հատկացվում, որից 4 տոկոսը պետությունն է սուբսիդավորում: Նպաստների գումարը կազմել է 200 մլն դրամ: Վարկերը հատկացվում են հայկական դրամով, վարկի միջին չափը կազմում է 625 հազար դրամ:

Միաժամանակ վարկերի արտոնյալ ժամանակահատվածը տևել է 6 ամիս, ինչից հետո մարվել են միայն տոկոսները, իսկ հաջորդ վճարների համար տրամադրվել է ևս կես տարի։

2014 թ.–ից գյուղատնտեսական վարկերի վարկային տոկոսադրույքը նվազել է` դառնալով 12–13 տոկոս, ինչի արդյունքում դրանք բավականին մատչելի ֆինանսական ռեսուրսներ դարձան` հաշվի առնելով 4–6 տոկոսի չափով սուբսիդավորումը։

2015 թ.–ին գյուղատնտեսական վարկերի սուբսիդավորման նպատակով նախատեսվում է հատկացնել 1,2 մլրդ դրամ։ Բացի այդ, ֆերմերական տնտեսություններին տրամադրվող բոլոր վարկերի փոխհատուցումը կբարձրանա` հասնելով 6 տոկոսի։

ԿԲ–ի տվյալներով` գյուղատնտեսության մեջ կատարված վարկային ներդրումները 2015 թ.–ի փետրվարի դրությամբ կազմել են 135,8 մլրդ դրամ` տարեսկզբի համեմատ ավելանալով 6 տոկոսով ($1 – 480,91 դրամ)։ --0—