Միջազգային «Ներդրումային համաժողովը» կկայանա գարնանը Հայաստանում

ԵՐԵՎԱՆ, 13 դեկտեմբերի. /ԱՌԿԱ/. Հայաստանի առևտրաարդյունաբերական պալատի կողմից իրականացվող «Արևելյան ներդրումներ» (East Invest) ծրագրի շրջանակներում միջազգային «Ներդրումային համաժողովը» կանցկացվի 2013թ.-ի մարտին Հայաստանում, հինգշաբթի տեղեկացրեց Հայաստանում «Արևելյան ներդրումներ» ծրագրի համակարգող Վլադիմիր Ամիրյանը:

«Մենք նախատեսում ենք մարտին Երևանում համաժողով անցկացնել և դրա ընթացքում ներկայացնել հաջողված հայկական նախագծերը, որոնք բավական շատ են: Մեր նպատակն է լավագույնս ներկայացնել մեր երկիրը եվրոպացի գործընկերներին»,- ասաց Ամիրյանը:

Ըստ նրա, համաժողովն անցկացնելու նախապատրաստական աշխատանքներն արդեն սկսված են, ներկա պահին ներդրումային ծրագրեր են հավաքվում՝ հետագայում դրանք ներդրողներին ներկայացնելու նպատակով:

Ամիրյանը տեղեկացրեց, որ համաժողովին նախատեսվում է 30-50 եվրոպական կազմակերպությունների մասնակցություն: Միջոցառման շրջանակներում նախատեսվում են հայ և եվրոպացի ձեռնարկատերերի հանդիպումներ, ովքեր կկարողանան քննարկել հետագա համագործակցության հարցերը:

Նա ավելացրեց նաև, որ անցյալ տարվա աշնանը հնգօրյա դասընթացներ են անցկացվել սկսնակ և կայացած ձեռնարկատերերի համար, մի քանիսը հետագայում մասնակցել են Եվրոպայի բիզնես–ցուցահանդեսներին:

Հայաստանի ԱԱՊ-ի ղեկավար Արայիկ Վարդանյանն էլ իր հերթին հայտնեց, որ 2012թ-ի սկզբից ՀՀ առևտրաարդյունաբերական պալատը սկսել է իրականացնել Twinning բաղադրիչը Պալատին կից գործող Արբիտրաժային դատարանի կարողությունների զարգացման, միջազգային համագործակցության, կարնետների և ծագման հավաստագրերի կիրառելու հնարավորությունները ուսումնասիրելու նպատակով։ Այցեր են կազմակերպվել Իսպանիայի, Հունգարիայի և Լեհաստանի առևտրաարդյունաբերական պալատներ, որտեղ կազմակերպվել են սեմինարներ կարողությունների զարգացման, փորձի փոխանակման նպատակով։
 
Ինչպես հայտնեց Հայաստանում ԵՄ պատվիրակության առաջին խորհրդական Օնո Սիմոնսը, «Արևելյան ներդրումներ» ծրագրի նպատակն է Արևելյան գործընկերության 6 երկրների ՓՄՁ–ների և գործարարությանն աջակցող կազմակերպությունների (Հայաստան, Ադրբեջան, Բելառուս, Վրաստան, Մոլդովա, Ուկրաինա) ներդրումային և առևտրային կապերի ընդլայնումը ԵՄ անդամ երկրների համապատասխան կազմակերպությունների հետ։

2011թ-ի սկզբից ՀՀ առևտրաարդյունաբերական պալատը Հայաստանում իրականացնում է «Արևելյան ներդրումներ» (East Invest) եռամյա ծրագիրը, որը ֆինանսավորվում է Եվրոպական Հանձնաժողովի կողմից Արևելյան Գործընկերության նախաձեռնության շրջանակներում և ղեկավարվում է Եվրոպալատի (Eurochambres) կողմից։

«Արևելյան գործընկերություն» ծրագիրն ուղղված է Ադրբեջանի, Հայաստանի, Վրաստանի, Մոլդովայի, Բելառուսի և Ուկրաինայի մերձեցմանը ԵՄ-ին: «Արևելյան գործընկերությունը» ԵՄ-ին անդամակցելու հնարավորություն չի նախատեսում, սակայն ավելի է մոտեցնում ԵՄ-ին քաղաքական և տնտեսական առումով, մասնավորապես հարկ է նշել մուտքի արտոնագրի ռեժիմի դյուրացումն ու համագործակցությունը էներգետիկայի ոլորտում: -0-