Շուրջ 200 հայկական բեռնատար կուտակվել է Իրանի հետ սահմանում. ՊԵԿ-ի մեկնաբանությունը
ԵՐԵՎԱՆ, 5 մարտի․/ԱՌԿԱ/․ Մոտ 180-200 հայկական բեռնատար կուտակվել է Իրանի հետ սահմանին գտնվող «Ագարակ» անցակետում՝ սահմանը հատելու հնարավորության սպասելով, հայտնում է ՊԵԿ-ը:
«Մեր ունեցած տեղեկություններով՝ իրանական կողմում պարբերաբար կապի խափանումներ են լինում, ինչի պատճառով ժամանակ առ ժամանակ կարող են հերթեր գոյանալ: Սակայն կապի բացակայության դեպքում ձևակերպումն իրականացվում է թղթային տարբերակով, ինչն ավելի շատ ժամանակ է պահանջում», - նշել են գերատեսչությունից՝ ի պատասխան «Արմենպրեսի» հարցմանը, թե որքանով է հավաստի տեղեկությունը, որ Իրանի կողմից հայ-իրանական սահմանի անցակետը փակվել է քաղաքացիների համար՝ բեռնատարների բնականոն տեղաշարժը ապահովելով։
ՊԵԿ-ից հայտնել են, որ տրանսպորտային կուտակումներից խուսափելու համար քաղաքացիների համար կարող են կիրառվել որոշակի սահմանափակումներ՝ բեռնատարների բնականոն տեղաշարժն ապահովելու նպատակով:
Մեկնաբանելով Մերձավոր Արևելքում լարվածության ֆոնին Հայաստանի և Իրանի միջև բեռնափոխադրումների ծավալների կրճատումը՝ ՊԵԿ-ից նշել են, որ, ըստ առկա տեղեկությունների, Իրանում տիրող իրավիճակի հետ կապված որոշ բեռնափոխադրողներ չեն ցանկանում օգտագործել նրա տարածքը որպես տարանցիկ երկիր։
«Դրա փոխարեն նրանք նախընտրում են բեռները Չինաստանից և Մերձավոր Արևելքի այլ երկրներից տեղափոխել Վրաստանի տարածքով: Հետևաբար, Իրանի միջոցով բեռնափոխադրումների ծավալների նվազումը բնական է թվում, և վերջին օրերին իսկապես նկատվում է որոշակի, թեև աննշան կրճատում», - հայտնել են ՊԵԿ-ից:
Իրանի շուրջ ծավալված իրադարձությունների մասին
Իսրայելը փետրվարի 28-ին «կանխարգելիչ» հարված է հասցրել Իրանին: ԱՄՆ նախագահ Դոնալդ Թրամփը հայտարարել է ամերիկյան ԶՈՒ-ի կողմից Իրանում լայնածավալ մարտական գործողությունների մեկնարկի մասին՝ նպատակ ունենալով «պաշտպանել ամերիկացի ժողովրդին՝ վերացնելով իրանական վարչակարգից բխող անմիջական սպառնալիքները»:
Նա հայտնել է Իրանի հրթիռային արդյունաբերությունն ու ռազմածովային նավատորմը ոչնչացնելու, ինչպես նաև Թեհրանի կողմից միջուկային զենքի ձեռքբերումը բացառելու ծրագրերի մասին: Ավելի ուշ իսրայելական աղբյուրները հայտնել են, որ Իրանը հրթիռներ է արձակել Իսրայելի և տարածաշրջանում ամերիկյան բազաների ուղղությամբ:
Իրանի պետական հեռուստատեսությունը փետրվարի 28-ին հայտնել է երկրի գերագույն առաջնորդ Ալի Խամենեիի մահվան մասին՝ իր նստավայրին հասցված ԱՄՆ-ի և Իսրայելի հարվածների հետևանքով. երկրում հայտարարվել է 40-օրյա սուգ:
