TRIPP նախագիծը վերջ է դնելու Հայաստանի շրջափակմանը․ Փաշինյան
ԵՐԵՎԱՆ, 24 օգոստոսի․/ԱՌԿԱ/․ «Թրամփի ուղի՝ հանուն միջազգային խաղաղության և բարգավաճման» (TRIPP) նախագիծը վերջ է դնելու Հայաստանի շրջափակմանը, հայտարարել է ՀՀ վարչապետ Նիկոլ Փաշինյանը։
«TRIPP նախագիծը, որն իրագործվելու է ՀՀ տարածքում և ՀՀ տարածքային ամբողջականության, ինքնիշխանության և իրավազորության սկզբունքների հիման վրա, վերջ է դնելու Հայաստանի շրջափակմանը», — նշեց Փաշինյանը ԱԺ-ում կառավարության 2026-31 թվականների ծրագիրը ներկայացնելիս։
Նրա խոսքով՝ Հայաստանի շրջափակումն այժմ արդեն մասամբ հաղթահարված է, քանի որ 2025 թվականի նոյեմբերից Ադրբեջանի երկաթուղին Վրաստանի տարածքով բաց է դեպի Հայաստան ներմուծումների և Հայաստանի տարածքից արտահանումների համար, իսկ Ախալքալաք–Կարս երկաթուղին մայիսին բացվեց Հայաստանից արտահանումների և դեպի Հայաստան ներմուծումների համար:
TRIPP նախագծի մասին
«Թրամփի ուղի՝ հանուն միջազգային խաղաղության և բարգավաճման» (TRIPP) նախագիծը նախատեսում է Հայաստանի տարածքում անխափան մուլտիմոդալ տարանցիկ ենթակառուցվածքի ստեղծում՝ իր տարածքում նախագծի ենթակառուցվածքի նկատմամբ հանրապետության լիակատար ինքնիշխանության պահպանմամբ: Մասնավորապես, նախագիծը պետք է ապահովի տրանսպորտային հաղորդակցություն Ադրբեջանի հիմնական մասի և Նախիջևանի Ինքնավար Հանրապետության միջև, ինչպես նաև ընդլայնի տարածաշրջանային երթուղիները, որոնք Կենտրոնական Ասիան և Կասպից տարածաշրջանը կապում են Եվրոպայի հետ:
Հայաստանը և ԱՄՆ-ն 2026 թվականի հունիսին ստորագրել են TRIPP-ի վերաբերյալ ռազմավարական համագործակցության շրջանակային համաձայնագիր. նախագծի իրականացման համար ստեղծվել է հայ-ամերիկյան համատեղ TRIPP Development Company ընկերությունը:
TRIPP-ը դիտարկվում է որպես ավելի լայն Անդրկասպյան առևտրային երթուղու մաս: Այս երթուղու երկայնքով մասնավոր ներդրումները խթանելու համար ԱՄՆ-ն գործարկել է Trans-Caspian Enterprise Fund-ը, որը կապիտալիզացվել է 201 մլն դոլարով՝ ամերիկյան կառավարության միջոցների հաշվին:
Հայաստանի վարչապետ Նիկոլ Փաշինյանը հայտարարել է, որ TRIPP-ը նախ և առաջ ներդրումային նախագիծ է, որի շնորհիվ ակնկալվում է նոր ներդրումների միլիարդավոր դոլարների հոսք դեպի Հայաստան:
