Բնական պաշարների գերշահագործումը Հայաստանի հիմնական բնապահպանական խնդիրն է. փոխնախարար

ԵՐԵՎԱՆ, 10 հուլիսի. /ԱՌԿԱ/. Բնական պաշարների գերշահագործումն այսօր  Հայաստանի հիմնական բնապահպանական խնդիրն է, հայտարարեց բնապահպանության նախարարի տեղակալ Սիմոն Պապյանը։ 

«Սարսափելի է պատկերացնել, թե ինչ կլինի, եթե առաջիկա 10 տարիներին մենք չկարողանանք լուծել այդ հարցը քաղաքակիրթ մեթոդներով։ Խոսքը ջրային, բուսական, կենդանական պաշարների, անտառապահպանության, ընդերքի գերշահագործման հետ կապված խնդիրների մասին է»,- երեքշաբթի ասաց Պապյանը՝ լրագրողներին ներկայացնելով Հայաստանի՝ Ազգային գնահատման զեկույցում ներառված հիմնական մարտահրավերները։ 

Զեկույցը Հայաստանի կողմից ներկայացվել է 2012 թվականին ՄԱԿ-ի «Ռիո-20» զարգացման և շրջակա միջավայրի համաժողովում (Կայուն զարգացման համաշխարհային գագաթնաժողով)։

Փոխնախարարի խոսքով` նշված մարտահրավերներին զուգընթաց անցած տարիներին Հայաստանը բնապահպանության ոլորտում դրական արդյունքների է հասել։ 

«Սկսած 2001 թվականից առ այսօր Սևանա լճի մակարդակը բարձրացել է 3 մետրով։ Բարելավվում է ջրի որակը, քանի որ մինչև տարեվերջ շահագործման կհանձնվեն մաքրման կայանները»,- տեղեկացրեց նա։ 

Մեկ այլ ձեռքբերում նա համարեց հատուկ պահպանվող տարածքների մակերեսների ընդլայնումը, երկու ազգային պարկերի և մի քանի արգելոցների ստեղծումը։ «Արդեն այսօր հանրապետության տարածքի 13 տոկոսը հատուկ պահպանվող տարածք է (ներառյալ Սևանա լճի հայելին)»,- ավելացրեց նա։ 

Պապյանի խոսքով, ևս մեկ դրական ցուցանիշ է  Հայաստանում ընդհանուր ջրամատակարարման ավելացումն օրական  6 ժամից (2004 թ.) մինչև 15 ժամ։  

Բացի այդ, բնապահպանության փոխնախարարը նշեց, որ անցյալ մի քանի տարիներին Հայաստանում վերականգնվել է 32 հազ. հա անտառային տարածք։

Ազգային զեկույցի մշակման նպատակը Հայաստանի կողմից 1992 թ. առաջին գագաթնաժողովից հետո անցկացված վերլուծությունն է կայուն զարգացման հասնելու ուղղությամբ, ինչպես նաև Հայաստանի առջև կանգնած գլոբալ և ազգային մարտահրավերների սահմանումն առաջիկա տասնամյակում։ -0-