Հայաստանում չորս տարեկան աղջիկ է մահացել աղիքային ինֆեկցիայի հետևանքով, ևս երեք երեխա տեղափոխվել է հիվանդանոց. ՀՀ ԱՆ

ԵՐԵՎԱՆ, 17 հունիսի. /ԱՌԿԱ/.  Հայաստանի Արմավիրի մարզի Ջրաշեն գյուղից չորս տարեկան մի աղջիկ է երեքշաբթի մահացել սուր աղիքային ինֆեկցիայի պատճառով, ևս երեք երեխաներ տեղափոխվել են հիվանդանոց նույն ախտանշաններով, հաղորդում է ՀՀ առողջապահության նախարարության մամուլի ծառայությունը։

Գերատեսչության տեղեկատվությամբ` աղջիկը երեքշաբթի ցերեկը տեղափոխվել է Արմավիրի բժշկական կենտրոնի ինֆեկցիոն բաժանմունք` ջերմություն, թուլություն, փսխում, լուծ ախտանշաններով։ Աղջկա վիճակը գնահատվել է միջին ծանրության։ Նա ստացել է վիճակին համապատասխան բուժում։

Սակայն երեկոյան փոքրիկի վիճակը կտրուկ վատացել է։ Տեղափոխելով վերակենդանացման բաժանմունք` մասնագետները համապատասխան միջոցներ են ձեռնարկել, սակայն երեխայի կյանքը փրկել չի հաջողվել։

Բացի այդ, այս պահին ռեանիմոբիլով «Սուրբ Աստվածամայր» բժշկական կենտրոն է տեղափոխվում նույն ախտանշաններով, ծանր վիճակում գտնվող փոքրիկ տղա` Նորապատ գյուղից։

Մոտ երկու ժամ առաջ Արմավիր քաղաքի նույն ընտանիքի երկու երեխա (տարբեր մանկապարտեզների սաներ) ևս ընդունվել են տեղի ինֆեկցիոն բաժանմունք։ Երկուսի վիճակն էլ գնահատվում է թեթև։

«ՀՀ առողջապահության նախարարի հանձնարարությամբ Արմավիրի մարզ են մեկնել նախարարի տեղակալ Սերգեյ Խաչատրյանը, ՀՀ ԱՆ գլխավոր ինֆեկցիոնիստ Արա Ասոյանը, մանկական ռեանիմատոլոգներ», – նշվում է մամուլի հաղորդագրության մեջ։

Վարակի աղբյուրը պարզաբանելու, կանխարգելիչ ու հակահամաճարակային աշխատանքներ իրականացնելու նպատակով տեղում աշխատում է ՀՀ ԱՆ Հիվանդությունների վերահսկման և կանխարգելման ազգային կենտրոնի մասնագետների խումբը։ Արմավիր է մեկնել նաև ՀՀ ԱՆ առողջապահական պետական տեսչության պետ Արտակ Սահակյանը:

Աշխատանքներում ընդգրկվել են նաև «Արաբկիր» և «Սուրբ Աստվածամայր» բժշկական կենտրոնների մասնագետները:

«Իրավիճակը հսկողության տակ է», – վստահեցնում են առողջապահության նախարարությունից։

Այս տարվա մայիսին Արմավիրի մի քանի մանկապարտեզներում գրանցվել են աղիքային ինֆեկցիայի տեղային բռնկումներ, ինչի հետևանքով տասնյակ երեխաներ տեղափոխվել էին հիվանդանոց։ –0–