Ռուսաստանն ինքն է հեռանում այս տարածաշրջանից. Ռուբինյան
ԵՐԵՎԱՆ, 13 դեկտեմբերի․/ԱՌԿԱ/. Հայաստանի իշխանությունները չեն ցանկանում Ռուսաստանին դուրս մղել Հարավային Կովկասից, Ռուսաստանն ինքն է լքում տարածաշրջանը։ Այս մասին հայտարարել է ՀՀ ԱԺ փոխնախագահ, Թուրքիայի հետ բանակցություններում հատուկ բանագնաց Ռուբեն Ռուբինյանը։
Նա նշել է, որ Հայաստանի ընդդիմության հայտարարությունները, թե Հայաստանի իշխանությունները ցանկանում են, որ Ռուսաստանը հեռանա և նրա փոխարեն Թուրքիան զբաղեցնի տեղը, սուտ են և չեն համապատասխանում իրականությանը։
«Փաստերը ցույց են տալիս, որ Ռուսաստանը հեռանում է։ Հայաստանի իշխանությունները չէին, որ վտարեցին Լեռնային Ղարաբաղում տեղակայված ռուս խաղաղապահներին, որոնք եռակողմ համաձայնագրի շրջանակում պետք է այնտեղ մնային առնվազն ևս մի քանի տարի»,- ասել է Ռուբինյանը Հանրային հեռուստաընկերությանը տված հարցազրույցում։
Նրա կարծիքով՝ չարժե Հայաստանի պարագայում զուգահեռներ անցկացնել Սիրիայի իրադարձությունների հետ, ինչպես դա անում է ընդդիմությունը։
«Սրանք իրենց հերթական անհեթեթ մեղադրանքներն են։ Էլ չեմ խոսում այն մասին, որ Սիրիայի և Հարավային Կովկասի համեմատություններն անտեղի են»,- ընդգծեց Ռուբինյանը։
