ՀԱՊԿ նոր գլխավոր քարտուղարի թեկնածուի մասին փաստաթղթերն ուղարվկել են մասնակից երկրներին. Սեմերիկով
ԵՐԵՎԱՆ, 20 մարտի./ԱՌԿԱ/. ՀԱՊԿ գլխավոր քարտուղարի պաշտոնում Բելառուսի թեկնածուի համաձայնեցման վերաբերյալ անհրաժեշտ բոլոր փաստաթղթերն ուղղվել են կազմակերպության բոլոր մասնակից երկրներին, չորեքշաբթի ՏԱՍՍ–ին տված հարցազրույցում տեղեկացրել է ՀԱՊԿ գլխավոր քարտուղարի ժամանակավոր պաշտոնակատար Վալերի Սեմերիկովը։
«Բելառուսի առաջարկած թեկնածուի համաձայնեցման համար անհրաժեշտ բոլոր ընթացակարգերն ու որոշումների ընդունման համար անհրաժեշտ փաստաթղթերի նախագծերն ուղարկվել են ՀԱՊԿ երկրներին», – նշել է Սեմերիկովը։
Նրա խոսքով, քանի որ որոշումների համաձայնեցման և ստորագրման ժամկետները կանոնակարգված չեն, ապա անհնար է ասել, թե երբ կհաստատվի նոր գլխավոր քարտուղարի նշանակումը։
ՀԱՊԿ գլխավոր քարտուղարի պաշտոնը թափուր է մնացել 2018 թ.-ի հոկտեմբերի 30-ից,երբ Հայաստանը հետ է կանչել իր ներկայացուցիչ Յուրի Խաչատուրովին` առանց կազմակերպության այլ անդամ պետությունների հետ նախնական համաձայնության: Այժմ ՀԱՊԿ գլխավոր քարտուղարի պարտականությունները կատարում է Ռուսաստանի ներկայացուցիչ Վալերի Սեմերիկովը:
Երևանը պահանջում է իր թեկնածուի նշանակումը, քանի որ Խաչատուրովը աշխատել է սահմանված երեք տարիների միայն կեսը (Հայաստանի պաշտոնավարման ժամկետնավարտվում է 2020 թ.-ին): Դրա հետ համաձայն չէ, մասնավորապես, Բելառուսի նախագահ Ալեքսանդր Լուկաշենկոն` ձգտելով իր երկրին փոխանցել ՀԱՊԿ գլխավոր քարտուղարի լիազորությունները:-0-