ՀՀ–ում Ադրբեջանի կողմից ռազմական օբյեկտի թիրախավորումը լեգիտիմիզացնում է մեր պատասխան քայլերը. ՀՀ ՊՆ
Այս մասին հայտարարեց ՀՀ ՊՆ ներկայացուցիչ Արծրուն Հովհաննիսյանն այսօր ճեպազրույցի ընթացքում։
«Օրվա ընթացքում մենք տեսանք նաև Ադրբեջանի հաղորդագրությունները այն մասին, որ Հայաստանի Հանրապետության տարածքում, ընդ որում սկզբից չկողմնորոշված նշում էին նախ Քարվաճառ, հետո Հայաստանի սահման, հետո Հայաստան, էսպես աշխարհագրության կարծես խնդիր ունեն, թիրախավորվել է մարտական հերթապահության մեջ գտնվող հրթիռային համակարգը, ինչը հատուկ ուզում ենք շեշտել, որ լեգիտիմիզացնում է Հայաստանի Հանրապետության կողմից համապատասխան պատասխան քայլերը և թիրախավորումը նմանատիպ ռազմական նշանակության թիրախների Ադրբեջանի տարածքում», – ընդգծեց Հովհաննիսյանը։
Այսօր ավելի վաղ ՀՀ ՊՆ հայտարարեց, որ հոկտեմբերի 14-ին ադրբեջանական զինուժը թիրախավորել է Հայաստանի Հանրապետության տարածքում, Քարվաճառի հետ սահմանակից գոտում մարտական հերթապահություն իրականացնող մարտական տեխնիկա՝ ընդամենը ենթադրությունների հիման վրա, թե, իբր, այդ տեխնիկան պատրաստ է եղել հարվածել Ադրբեջանի խաղաղ բնակավայրերին։–0–
