Հայաստանի և Թուրքիայի ԱԺ խոսնակները քննարկել են խաղաղության գործընթացը Հարավային Կովկասում ու «Խաղաղության խաչմերուկը»
ԵՐԵՎԱՆ, 15 հոկտեմբերի․/ԱՌԿԱ/․ ԱԺ խոսնակ Ալեն Սիմոնյանն անդրադարձել է իր թուրք գործընկեր Նուման Քուրթուլմուշի հետ հանդիպմանը։
«Միջխորհրդարանական միության 149–րդ վեհաժողովի շրջանակում բովանդակալից հանդիպում եմ ունեցել Թուրքիայի Ազգային մեծ ժողովի նախագահ Նուման Քուրթուլմուշի հետ։ Քննարկել ենք երկկողմ հարցերի լայն շրջանակ, խաղաղ գործընթացը Հարավային Կովկասում և տարածաշրջանում։ Ներկայացրեցի նաև ՀՀ կառավարության «Խաղաղության խաչմերուկ» նախագիծը։ Մենք պայմանավորվեցինք շարունակել մեր շփումները հետագայում», – գրել է Սիմոնյանը X–ի միկրոբլոգում։
Ինչպես հայտնում է ՀՀ ԱԺ մամուլի ծառայությունը, հանդիպման ժամանակ կողմերը քննարկել են հայ-թուրքական հարաբերությունների կարգավորմանը վերաբերող հարցերի լայն շրջանակ:
ՀՀ ԱԺ նախագահը թուրքական կողմին է ներկայացրել Հայաստանի եւ Ադրբեջանի միջեւ խաղաղության պայմանագրի շուրջ բանակցությունների գործընթացում վերջին զարգացումները և վերահաստատել հայկական կողմի պատրաստակամությունը խաղաղության հաստատման գործընթացին: Ալեն Սիմոնյանը թուրք գործընկերոջն է ներկայացրել նաև Հայաստանի կառավարության նախաձեռնած «Խաղաղության խաչմերուկ» նախագիծը:
