ՄՄ անդամակցությունը Հայաստանին տարեկան ավելի քան 100 մլն դոլարի ֆինանսական օգուտ կտա` արտահանվող տուրքերը հանելու հաշվին. նախկին դեսպան

ԵՐԵՎԱՆ, 8 նոյեմբերի. /ԱՌԿԱ/. Մաքսային միությանը Հայաստանի անդամակցությունը կարող է նրան տարեկան ՀՆԱ–ի 4–4,5 տոկոսանոց աճ տալ, հայտնեց Հայաստանում ՌԴ նախկին դեսպան, Կասպյան համագործակցության ինստիտուտի տարածաշրջանային ծրագրերի տնօրեն Վյաչեսլավ Կովալենկոն։

«ՄՄ կազմում ընդգրկվելուց հետո Հայաստանը ակնթարթորեն մեծ ֆինանսական օգուտ կստանա` տարեկան ավելի քան 100 մլն դոլարի չափով, Հայաստան մատակարարվող գազի, նավթարտադրանքի և ադամանդե հումքի արտահանման  տուրքերը հանելու հաշվին»,– «Հայաստան և Մաքսային միություն. եվրասիական ինտեգրման հասարակական չափում» թեմայով Երևան–Մոսկվա տեսակամրջի ընթացքում հայտնեց Կովալենկոն։

Նա նշեց նաև, որ «ճանապարհային քարտեզը» որի շուրջ այժմ աշխատում են Հայաստանի և եվրասիական տնտեսական հանձնաժողովի փորձագետները, Հայաստանի տրանսպորտային համակարգում, էներգետիկ օբյեկտների արդիականացման և քիմիական արտադրություն խոշոր ներդրումներ են ենթադրում։

Կովալենկոն ավելացրեց, որ Հայաստանը շարունակում է արժութային մուտքերի էական մասնաբաժին ստանալ, որը համեմատելի է երկրի բյուջեի հետ` Ռուսաստան աշխատանքային միգրացիայի հաշվին։ «Միաժամանակ Եվրոպան մոտ հեռանկարում չի կարող փոխարինող առաջարկ անել աշխատանքի ռուսական շուկային, և Հայաստանը պետք է երկարատև հերթ կանգնի` Եվրամիության երկրներ միգրացիոն քաղաքականության մեղմացման համար»,– ասաց նա։

Սեպտեմբերի 3-ին Հայաստանի և Ռուսաստանի նախագահներ Սերժ Սարգսյանի և Վլադիմիր Պուտինի բանակցություններից հետո հայտարարվել է, որ Հայաստանը միանալու է Մաքսային միությանը և հետագայում ներգրավվելու է Եվրասիական տնտեսական միության ձևավորման գործընթացում։ Հայաստանը պատրաստ է գրեթե ողջ ծավալով ընդունել Մաքսային միություն մտնելու համար անհրաժեշտ պարտավորությունները, և այդ հարցի լուծման նպատակով ստեղծված աշխատանքային խումբն արդեն դեկտեմբերին կներկայացնի «ճանապարհային քարտեզը»։ --0--