ՌԴ նախագահը շնորհավորել է ՀՀ նախագահին ծննդյան օրվա կապակցությամբ

ԵՐԵՎԱՆ, 30 հունիսի. /ԱՌԿԱ/. ՌԴ նախագահ Վլադիմիր Պուտինն ուրբաթ շնորհավորական ուղերձ է հղել ՀՀ նախագահ Սերժ Սարգսյանին ծննդյան օրվա կապակցությամբ, հաղորդում է ՀՀ նախագահի մամուլի ծառայությունը։

ՀՀ նախագահ Սերժ Սարգսյանը հունիսի 30–ին դարձավ 63 տարեկան։

«Հարգելի՛ Սերժ Ազատի, ընդունեք սրտանց շնորհավորանքներս Ձեր ծննդյան օրվա առթիվ, Ձեր երկարամյա պետական գործունեությամբ՝ Դուք վաստակել եք Ձեր հայրենակիցների մեծ հարգանքը և զգալի հեղինակություն արտերկրում: Բարձր ենք գնահատում մեր երկրների միջև բարեկամական, դաշնակցային հարաբերությունների ամրապնդման, ինչպես նաև եվրասիական տարածքում փոխշահավետ ինտեգրացիոն գործընթացների զարգացման գործում Ձեր անձնական ներդրումը», – նշվում է Վլադիմիր Պուտինի շնորհավորական ուղերձում։

«Մշտապես ուրախ եմ շփվել Ձեզ հետ: Հուսով եմ, որ մեր կառուցողական երկխոսությունը և երկկողմ ու միջազգային օրակարգի արդիական հարցերի շուրջ համատեղ արգասաբեր աշխատանքը կշարունակվի:
Սրտանց մաղթում եմ Ձեզ, հարգելի՛ Սերժ Ազատի, քաջառողջություն, երջանկություն, բարօրություն, հաջողություններ և ամենայն բարիք»,-ասված է ՌԴ նախագահի շնորհավորական ուղերձում:–0–