Վիգեն Սարգսյանն առաջիկայում ՌԴ–ում կստորագրի Զորքերի միավորված խմբավորման մասին համաձայնագիրը
ԵՐԵՎԱՆ, 16 նոյեմբերի. /ԱՌԿԱ/. ՀՀ պաշտպանության նախարար Վիգեն Սարգսյանն առաջիկայում կայցելի Ռուսաստան, որտեղ կստորագրի երկու երկրների Զորքերի միավորված խմբավորման մասին համաձայնագիրը։
Այս մասին Վիգեն Սարգսյանը հայտարարել է երեքշաբթի երեկոյան ԶԼՄ–ների ներկայացուցիչների հետ կայացած հանդիպման ժամանակ, որը տևել է շուրջ չորս ժամ։
«Առաջիկայում ես պաշտոնական այցով կմեկնեմ Ռուսաստանի Դաշնություն», – նշեց Սարգսյանը։
Նախարարի համար սա կլինի առաջին օտարերկրյա այցը նոր պաշտոնում, որը նա ստանձնել է հոկտեմբերի 3–ին։
«Այցի ընթացքում կստորագրվի Հայաստանի և Ռուսաստանի զորքերի միավորված խմբավորման մասին համաձայնագիրը», – տեղեկացրեց նա։
Սարգսյանը պարզաբանեց, որ այդ փաստաթուղթը «վերաբերում է այդ ստորաբաժանման կիրառման կարգին, հրամաններ տալուն և այլ հարցերին»։
«Այս ոլորտը կարգավորող բազմաթիվ փաստաթղթեր են եղել, սակայն դրանք այդքան համապարփակ չեն եղել, որքան այս համաձայնագիրը», – նշեց նախարարը։
«Մենք շատ սերտ համագործակցում ենք ռուս գործընկերների հետ», – ընդգծեց նախարարն ու ավելացրեց, որ դա վերաբերում է նաև սպառազինության ձեռքբերմանն ու ռազմատեխնիկական համագործակցությանը։
Սարգսյանը հիշեցրեց, որ Հայաստանը գնել է նորագույն ռուսական սպառազինություն Մոսկվայի տրամադրած արտոնյալ պետական վարկի շնորհիվ։ «Ձեռք բերված ողջ սպառազինությունը մատակարարվել է ճիշտ ժամանակին և նախատեսված ժամկետներում», – նշեց նա։
Գերատեսչության ղեկավարը նաև հաստատեց, որ Հայաստանը գնել է սպառազինությունը «ռուսական ներքին գներով` որպես ՀԱՊԿ–ի մասնակից և Ռուսաստանի դաշնակից»։ –0–
