Հայաստանը բարձր է գնահատում ԵԽ–ի աշխատանքը տեղական ժողովրդավարության զարգացման հարցում. նախագահ

ԵՐԵՎԱՆ, 11 հոկտեմբերի. /ԱՌԿԱ/. Հայաստանը բարձր է գնահատում Եվրախորհրդի դերը տեղական ժողովրդավարության զարգացման հարցում, ասվում է ՀՀ նախագահ Սերժ Սարգսյանի ուղերձում` ուղղված Եվրախորհրդի երկրների մայրաքաղաքների քաղաքապետների համաժողովի  մասնակիցներին։

Պետության ղեկավարի ուղերձն ընթերցել է փոխվարչապետ, ՀՀ տարածքային կառավարման նախարար Արմեն Գևորգյանը։

«Համոզված ենք, որ տեղական ժողովրդավարությունը հասարակությունների ժողովրդավարական զարգացման համար առանցքային բաղադրիչ է: Այս նկատառումով է, որ այդ ոլորտը ներառվել է Հայաստանի նախագահության առաջնայնություններում՝ որպես հիմնական ուղղություններից մեկը»,– նշել է նախագահը, հաղորդում է «Նովոստի–Արմենիան»։

Ուղերձում նշվում է, որ Հայաստանը բարձր է գնահատում այն աշխատանքը, որ տարիներ ի վեր կատարում է Եվրոպայի խորհուրդը, մասնավորապես՝ Տեղական և շրջանային իշխանու¬թյուննե¬րի կոնգրեսը, անդամ երկրներում տեղական ժողովրդավարության զար¬գաց¬մ¬ան ուղ¬ղու¬թյամբ։

«Մեզ ուրախացնում է, որ տեղական ժողովրդավարությունը Հայաստանի առաջնահերթություններից մեկն է հայտարարվել, ինչը հիմք է հանդիսացել մեր կողմից այդ համաժողովն անցկացնելու համար, որը նվիրված է մայրաքաղաքի խնդիրներին»,– իր հերթին հայտնեց Երևանի քաղաքապետ Տարոն Մարգարյանը։

Նա ավելացրեց նաև, որ սա արդեն երկրորդ խոշորագույն միջոցառումն է, որը նվիրված է ԵԽ–ում ՀՀ նախագահության շրջանակում տեղի ժողովրդավարությանը` հիշեցնելով, որ հունիսի 19–ին տեղի է ունեցել «Մասնակցային ժողովրդավարությունը տեղական մակարդակում» համաժողովը։

Համաժողովի օրակարգի հարցերի թվում են քաղաքապետարանների,  հասարակական ծառայությունների տրամադրման հետ կապված խնդիրների քննարկումը, ինչպես նաև մայրաքաղաքի բնակիչների կյանքի որակի բարելավմանն ուղղված արդի մարտահրավերները։ –0–

Ծանոթացեք լուրերին առաջինն ու քննարկեք դրանք մեր Telegram-ում

19:18 11.10.2013