ՌԴ նախագահը շնորհավորել է իր հայ գործընկերոջը ծննդյան օրվա առթիվ

ԵՐԵՎԱՆ, 30 հունիսի. /ԱՌԿԱ/. ՌԴ նախագահ Վլադիմիր Պուտինը շնորհավորել է ՀՀ նախագահ Սերժ Սարգսյանին ծննդյան օրվա առթիվ, հաղորդում է ՀՀ նախագահի մամուլի ծառայությունը։

«Հարգելի՛ Սերժ Ազատի, ընդունեք ամենաանկեղծ շնորհավորանքները Ձեր ծննդյան օրվա կապակցությամբ: Ձեր պետական գործունեության տարիներին Դուք ձեռք եք բերել Ձեր հայրենակիցների շրջանում արժանի հարգանք, ինչպես նաև մեծ հեղինակություն՝ միջազգային ասպարեզում: Բարձր եմ գնահատում Ձեր անձնական ներդրումը մեր երկրների միջև բարեկամական, դաշնակցային հարաբերությունների ամրապնդման գործում», –նշվում է շնորհավորական ուղերձում։

«Ջերմությամբ եմ հիշում վերջերս Մոսկվա կատարած Ձեր այցը, որի ընթացքում մենք միասին մասնակցեցինք Հայրենական մեծ պատերազմում հաղթանակի 70-րդ տարեդարձին նվիրված միջոցառումներին: Ուրախ կլինեմ մեր նոր հանդիպումների, կառուցողական երկխոսության և համատեղ սերտ աշխատանքի շարունակության համար՝ ի բարօրություն Հայաստանի և Ռուսաստանի եղբայրական ժողովուրդների», – նշել է Պուտինը։

Երեքշաբթի նաև հեռախոսազրույց է տեղի ունեցել Հայաստանի և Ռուսաստանի նախագահների միջև, որի ընթացքում Պուտինը, շնորհավորելով Սարգսյանին, նրան բարեմաղթանքներ հղել ծննդյան օրվա կապակցությամբ:

Երկու երկրների ղեկավարները հեռախոսազրույցի ժամանակ անդրադարձել են նաև ռազմավարական դաշնակից պետությունների միջև հարաբերությունների խորացմանն ու բոլոր ոլորտներում համագործակցության զարգացմանը վերաբերող հարցերին:–0–