Նալբանդյանը Վրաստանի նախագահին հրավիրել է Հայաստան
ԵՐԵՎԱՆ, 18 նոյեմբերի. /ԱՌԿԱ/. ՀՀ ԱԳ նախարար Էդվարդ Նալբանդյանը, ով ՀՀ էներգետիկայի ու բնական պաշարների նախարար Արմեն Մովսիսյանի հետ կիրակի մասնակցել է Վրաստանի նորընտիր նախագահ Գեորգի Մարգվելաշվիլիի երդմնակալության արարողությանը, հրավիրել է նրան Հայաստան, հաղորդում է ՀՀ ԱԳՆ մամուլի ծառայությունը։
Հանդիսավոր արարողության ավարտից հետո տեղի ունեցած հանդիպման ընթացքում Նալբանդյանը Վրաստանի նախագահ Գեորգի Մարգվելաշվիլին փոխանցել է Հայաստանի նախագահ Սերժ Սարգսյանի շնորհավորանքները։
Գեորգի Մարգվելաշվիլին գոհունակություն է հայտնել Հայաստանի և Վրաստանի միջև բարձր մակարդակի հարաբերությունների կապակցությամբ` վստահություն հայտնելով, որ երկուստեք ջանքերով հնարավոր է դրանք առավել խորացնել և ամրապնդել:
Զրուցակիցները քննարկեցիլ են հայ-վրացական երկկողմ հարաբերություններին, տնտեսական համագործակցությանը, միջկառավարական հանձնաժողովի առաջիկա նիստին, միջխորհրդանական փոխգործակցությանը, ինչպես նաև վիրահայությանը առնչվող հարցեր:
Նույն օրը Էդվարդ Նալբանդյանն ու Արմեն Մովսիսյանը հանդիպեցին Վրաստանի վարչապետ Բիձինա Իվանիշվիլիի հետ։
Հանդիպումներին ներկա էր Վրաստանում Հայաստանի դեսպան Հովհաննես Մանուկյանը։
Նույն օրը առավոտյան տեղի ունեցավ Հայաստանի և Վրաստանի արտգործնախարարներ Էդվարդ Նալբանդյանի և Մայա Փանջիկիձեի առանձնազրույցը, որի ընթացքում տեղի ունեցավ մտքերի հանգամանալից փոխանակում հայ-վրացական հարաբերությունների օրակարգային հարցերի շուրջ։–0–
Ծանոթացեք լուրերին առաջինն ու քննարկեք դրանք մեր Telegram-ում
13:41 18.11.2013
