ԱԳ նախարար․ Երևանն ու Բաքու պայմանավորվել են այն կետերի շուրջ, որոնք գրված ու հրապարակված են, «մնացած բանավոր մեկնաբանություններն էական չեն»

ԵՐԵՎԱՆ, 20 սեպտեմբերի․/ԱՌԿԱ/․ Մենք այսօր էլ պատրաստ ենք րոպե առաջ սկսել խաղաղության պայմանագրի ստորագրման տեղի և վայրի մասին խորհրդակցությունները: 

Այս մասին Կ. Դեմիրճյանի անվան մարզահամերգային համալիրի տարածքում, լրագրողների հետ զրույցի ընթացքում ասել է Արտաքին գործերի նախարար Արարատ Միրզոյանը, հաղորդում է «Առաջին լրատվականը»։ 

Նրա խոսքով՝ «Թրամփի ուղու» շուրջ դետալները հստակեցվելու են Հայաստանի և ԱՄՆ-ի պատվիրակությունների միջև շփումների, քննարկումների, բանակցությունների միջոցով։  

«Իսկ ադրբեջանական կողմի հետ կան ընդհանուր պատկերացումները, և դրանք արտահայտված են ստորագրված վաշինգտոնյան հռչակագրում, որտեղ ամրագրված է, որ ապաշրջափակումը տեղի է ունենալու 2 երկրների տարածքային ամբողջականության, սահմանների անձեռնմխելիության, ինքնիշխանության, իրավազորության ներքո՝ անխոչընդոտ, փոխադարձ առավելություններով», – ասել է նա։

Նախարարը ևս մեկ անգամ ընդգծել է՝ պայմանավորվել են այն կետերի շուրջ, որոնք գրված ու հրապարակված են, «մնացած բանավոր մեկնաբանություններն էական չեն»։ 

«Մենք ինչպես նախաստորագրելու պահին, ինչպես դրանից  առաջ, երբ տեքստը համաձայնեցված էր մարտի կեսերին, հայտարարեցինք, որ պատրաստ ենք րոպե առաջ սկսել ստորագրման տեղի ու վայրի վերաբերյալ խորհրդակցությունները։ Հիմա էլ պատրաստ ենք»,-ասաց Արարատ Միրզոյանը։

Հիշեցնենք՝ այսօր՝ սեպտեմբերի 20-ին,  Կ. Դեմիրճյանի անվան մարզահամերգային համալիրում տեղի է ունենալու «Քաղաքացիական պայմանագիր» կուսակցության համաժողովը։