Համագործակցությունն ԱՊՀ շրջանակում օգտակար է Հայաստանի համար. նախագահ
ԵՐԵՎԱՆ, 9 ապրիլի. /ԱՌԿԱ/. Համագործակցությունն ԱՊՀ շրջանակում օգտակար է Հայաստանի համար, ասել է Հայաստանի նախագահ Սերժ Սարգսյանը «Միր» հեռուստաալիքին տված հարցազրույցում։
«Մենք մեզ համարում ենք ԱՊՀ–ի ակտիվ անդամ և միշտ հանդես ենք գալիս տարատեսակ նախաձեռնություններով։ Մենք նաև այդ միության գրեթե բոլոր մարմինների անդամն ենք։ ԱՊՀ–ի շրջանակում իրականացվող համագործակցությունը շատ օգտակար է Հայաստանի համար», – նշել է նախագահը։
Նրա խոսքերով` Հայաստանը ԱՊՀ երկրների միջև ազատ առևտրի համաձայնագիրը վավերացրած առաջին երկրներից է, և այս հարցում կազմակերպությունն օգնել է պահպանել բազմաթիվ տնտեսական կապեր, ինչը բավականին կարևոր հանգամանք է։
Նախագահը նաև կարևորել է ԱՊՀ–ի շրջանակում համագործակցությունը ռազմական և պաշտպանական տեսանկյունից` ավելացնելով, որ այս ոլորտում ակտիվ աշխատանք է ընթանում։
«Կարծում եմ, որ դեռ հնարավոր չէ ոչնչով փոխարինել ԱՊՀ–ի շրջանակում իրականացվող հումանիտար համագործակցությունը, քանի որ մենք շատ երկար ժամանակ ապրել ենք կողք–կողքի` միևնույն երկրի սահմաններում, և մեզ մոտ ձևավորվել են շատ ամուր կապեր, և հիմա, անկախության պայմաններում, անհրաժեշտ է դրանք ամրապնդել կամ գոնե չկորցնել», – ավելացրել է Սարգսյանը։–0–
Ծանոթացեք լուրերին առաջինն ու քննարկեք դրանք մեր Telegram-ում
21:24 09.04.2015
