Արցախում շուրջ 2.5 անգամ երկարած շփման գիծ Ադրբեջանի հետ, սահմանափակված հաղորդակցություն ՀՀ-ի հետ. ԱՀ նախագահը՝ անվտանգության ռիսկերի մասին (ՎԻԴԵՈ)
ԵՐԵՎԱՆ, 16 դեկտեմբերի./ԱՌԿԱ/. Արցախի իշխանությունները կատարում են հնարավոր ամեն ինչ սահմաններում առկա անվտանգային մարտահրավերների չեզոքացման ու անորոշությունների հստակեցման ուղղությամբ, հայտնել է Արցախի նախագահ Արայիկ Հարությունյանն իր ուղերձում, որի տեքստը հրապարակվել է Facebook-յան էջում:
Նախագահի խոսքով, այդ համատեքստում լիովին հասկանալի է, որ նաև հետպատերազմյան ժամանակաշրջանում քաղաքացիներին ու իշխանություններին ամենաշատ հուզող հարցերը վերաբերում են անվտանգությանն ու առնչվող անորոշություններին:
Հարությունյանն ընդգծել է, որ մի կողմից ունենք պատերազմի հետևանքով շուրջ երկուսուկես անգամ երկարած շփման գիծ ադրբեջանական կողմի հետ:
«Կոնկրետ հատվածներում անմիջական մոտեցում մեր որոշ բնակավայրերի և խիստ սահմանափակված՝ Մայր Հայաստանի հետ հաղորդակցության միջոցներ»,- նշել է նա:
Իսկ մյուս կողմից, նրա խոսքով, ունենք ողջ հայ ժողովրդի ու Հայաստանի Հանրապետության շարունակական աջակցությամբ և Ռուսաստանի Դաշնության խաղաղապահ զորակազմի ներկայությամբ պայմանավորված անվտանգության երաշխիքները:
«Այժմ Արցախի իշխանությունները կատարում են հնարավոր ամեն ինչ մեր լիազորությունների ու կարողությունների սահմաններում առկա անվտանգային մարտահրավերների չեզոքացման ու անորոշությունների հստակեցման ուղղությամբ, որոնց մի մասը կախված է նաև ամենաբարձր մակարդակի միջազգային բանակցությունների արդյունքներից: Այնուամենայնիվ, անկախ առկա օբյեկտիվ դժվարություններից՝ մեկ բան ակնհայտ է մեզ համար, այն է՝ Պաշտպանության բանակը, ողջ հայության աջակցությամբ, շարունակելու է իր գործառույթներն ու ջանքերը Արցախի բնակչության ֆիզիկական անվտանգության ապահովման ուղղությամբ, որոնք լրացվում են Ռուսաստանի Դաշնության խաղաղապահ զորակազմի երաշխիքներով»,- նշել է Հարությունյանը: -0-
