Արցախի նախագահը շնորհավորել է ՀՀ նախագահին` ծննդյան 60-րդ տարեդարձի կապակցությամբ

ԵՐԵՎԱՆ, 30 հունիսի. /ԱՌԿԱ/. Արցախի Հանրապետության նախագահ Բակո Սահակյանը հունիսի 30-ին շնորհավորական ուղերձ է հղել Հայաստանի Հանրապետության նախագահ Սերժ Սարգսյանին` ծննդյան 60-րդ տարեդարձի կապակցությամբ:

Ինչպես նշում են նախագահի մամուլի ծառայությունից, Բակո Սահակյանը Արցախի ժողովրդի, իշխանությունների և անձամբ իր անունից շնորհավորել է ՀՀ նախագահին և նշել. «Դուք կանգնած եք եղել Արցախյան ազգային-ազատագրական շարժման ակունքներում և մեծ ավանդ ունեք հայկական երկու հանրապետությունների կայացման ու զարգացման, հայոց բանակի կազմավորման եւ մեր բոլոր հաղթանակների կերտման գործում:

Ուղերձում նշված է, որ ՀՀ նախագահը տարբեր ժամանակներում բարձր պաշտոններ զբաղեցնելով Արցախում և Հայաստանում` անմնացորդ նվիրվել է հարազատ ժողովրդի շահերի պաշտպանությանը, համազգային նպատակների ու ծրագրերի իրականացմանը: «Դա հայրենանվեր եւ ազգանպաստ ծառայություն է, որն արժանի է բարձր գնահատանքի»,– նշել է Բակո Սահակյանը:

Արցախի նախագահը ՀՀ նախագահին և նրա բոլոր հարազատներին ու մերձավորներին մաղթել է խաղաղություն, քաջառողջություն, երկար տարիների կյանք ու մեծագույն հաջողություններ, զորացում ու բարգավաճում` մեր հերոսական ժողովրդին ու հայրենիքին:-0-

Ծանոթացեք լուրերին առաջինն ու քննարկեք դրանք մեր Telegram-ում

13:33 30.06.2014