Երևանը և Ստեփանակերտը պատերազմ չեն ցանկանում. Սերժ Սարգսյան
ԵՐԵՎԱՆ, 2 մարտի. /ԱՌԿԱ/. Երևանը և Ստեփանակերտը պատերազմ չեն ցանկանում, ասել է Հայաստանի նախագահ Սերժ Սարգսյանը հինգշաբթի Դիվանագետի օրվա կապակցությամբ ՀՀ դիվանագիտական ներկայացուցչությունների և հյուպատոսական հիմնարկների ղեկավարների հավաքի մասնակիցների հետ հանդիպման ընթացքում։
Սերժ Սարգսյանը հանդես է եկել ելույթով և ի թիվս այլ թեմաների անդրադարձել է նաև Լեռնային Ղարաբաղի հիմնախնդրին։
Նա նշել է, որ Երևանը և Ստեփանակերտը պատերազմ չեն ցանկանում, մինչդեռ Բաքուն վաղուց ամենաբարձր մակարդակում անընդհատ խոսում է պատերազմի մասին` մեծացնելով լարվածությունը շփման գծում, հերոսացնելով այն զինվորներին, որոնց գործած, այսպես ասած, «սխրանքները» համարվում են պատերազմի հանցագործություն:
«Եթե Ադրբեջանը շարունակի նույն ոգով և իրավիճակը հասցնի պատերազմականի, ապա Արցախի ժողովրդի անվտանգությունն ապահովելու համար մենք մեկ վայրկյան անգամ կանգ չենք առնի կիրառելու մեր զինանոցում եղած բոլոր հնարավորությունները»,– ընդգծել է նա։
Պետության ղեկավարի խոսքով, այսօր տարածաշրջանում լայնածավալ պատերազմի զսպող գլխավոր գործոնը հայ զինվորն է, ով ամուր կանգնած է և հստակ գիտակցում է, թե ինչի համար է պայքարում և ինչ խնդիր է լուծում: -0-
