Եվրոպական դատարանը Ադրբեջանի կառավարությունից պահանջել է փաստաթղթավորված տեղեկություն նրանց գերեվարման փաստի, գտնվելու վայրի, պահման պայմանների և բժշկական սպասարկման վերաբերյալ

ԵՐԵՎԱՆ, 28 նոյեմբերի․ /ԱՌԿԱ/․ Եվրոպական դատարանում հայ գերիների իրավունքների պաշտպանության մասին 27.09.2020թ. վաղ առավոտյան Ադրբեջանի կողմից Արցախի դեմ նախաձեռնված լայնամասշտաբ պատերազմի ընթացքում գերության մեջ հայտնված զինվորական ծառայողների և ձերբակալված քաղաքացիական անձանց իրավունքների պաշտպանության գործով Եվրոպական դատարանը 23.11.2020թ․-ին և 27.11.2020թ․-ին բավարարել է փաստաբանների դիմումները՝ կիրառելով հրատապ միջոց։ Փաստաբաններ Սիրանուշ Սահակյանն ու Արտակ Զեյնալյանը հայտնել են, որ ՄԻԵԴ-ը բավարարել է իրենց դիմումներն ու հրատապ միջոց է կիրառել 10 գերեվարված անձի և 3 ձերբակալվածի առնչությամբ։ 

Ձերբակալված քաղաքացիական անձինք են Ջոնիկ Թևոսյանը, Էդվարդ և Արեգա Շահգելդյանները: 

«Եվրոպական դատարանը Ադրբեջանի կառավարությունից պահանջել է փաստաթղթավորված տեղեկություն նրանց գերեվարման փաստի, գտնվելու վայրի, պահման պայմանների և բժշկական սպասարկման վերաբերյալ: Դատարանը պահանջվող տեղեկությունը տրամադրելու համար, համապատասխանաբար, ժամկետ է սահմանել մինչև 30.11.2020թ և 04.12.2020թ»,-գրել է Զեյնալյանը Facebook-յան իր էջում։-0-