Ֆրանսիան ամեն ինչ կանի, որպեսզի Ղարաբաղի շուրջ բանակցությունները հասնեն իրենց վերջնական հանգրվանին

ԵՐԵՎԱՆ, 13 նոյեմբերի. /ԱՌԿԱ/. Ֆրանսիան ամեն ինչ կանի, որպեսզի Ղարաբաղի շուրջ բանակցությունները հասնեն իրենց վերջնական հանգրվանին, նախօրեին հայտարարել է Ֆրանսիայի նախագահ Ֆրանսուա Օլանդը՝ Փարիզում Հայաստանի նախագահ Սերժ Սարգսյանի հետ հանդիպման ավարտին կայացած համատեղ ասուլիսի ընթացքում:
Պետությունների ղեկավարների հանդիպումը կայացել է Հայաստանի նախագահի՝ Ֆրանսիա կատարած եռօրյա պաշտոնական այցի ընթացքում, որը մեկնարկել է նոյեմբերի 11-ին:

«Իհարկե, հանդիպման ժամանակ հիմնականում խոսեցինք ամենակարևոր հարցի մասին, որը Լեռնային Ղարաբաղի հիմնահարցն է: Ելնելով նաև իմ պատասխանատվության շրջանակներից, քանի որ Ֆրանսիան համանախագահն է Մինսկի խմբի, ես վերահաստատեցի, որ մենք պիտի ամեն ինչ անենք, և որ Ֆրանսիան ամեն ինչ կանի, որպեսզի բանակցությունները հասնեն իրենց վերջնական հանգրվանին»,- Օլանդի խոսքն է մեջբերում Հայաստանի նախագահի մամուլի ծառայությունը:

Ֆրանսիացի նախագահի խոսքով, «դրանք ինչ-որ պահի դադարել էին, պիտի վերսկսվեն և ընթանան մինչև վերջ, ընդորում՝ մեզ հայտնի սկզբունքների հիման վրա՝ Մադրիդյան սկզբունքների հիման վրա, որպեսզի այս հիմնահարցը գտնի տևական, ես կասեի՝ վերջնական լուծում: Սա նաև իմ պատասխանատվության շրջանակի հարց է, քանի որ Ֆրանսիան Մինսկի խմբի համանախագահ է»,- ընդգծել է Օլանդը:
Ղարաբաղյան հակամարտությունը սկսվել է 1988 թվականին, երբ գերազանցապես հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին: 1991թ. դեկտեմբերի 10-ին Լեռնային Ղարաբաղում հանրաքվե անցկացվեց, որի ժամանակ մասնակիցների 99,89 տոկոսը քվեարկեց Ադրբեջանից լիովին անկախանալու օգտին:
Դրան հետևեցին Ադրբեջանի ձեռնարկած լայնածավալ ռազմական գործողությունները, որոնք հանգեցրին նրան, որ նրանք կորցրեցին վերահսկողությունը ոչ միայն Լեռնային Ղարաբաղի, այլև հարակից յոթ շրջանների նկատմամբ:

1994թ. մայիսի 12-ին զինադադարի վերաբերյալ եռակողմ համաձայնագրի կնքումից  հետո հակամարտության գոտում դադարեցին ռազմական գործողությունները, որոնց արդյունքում երկու կողմից էլ եղավ շուրջ 25-30 հազար զոհ և մոտ մեկ միլիոն մարդ  ստիպված լքեց բնօրրանը:

Հրադադարի ռեժիմ հաստատելու վերաբերյալ համաձայնագիրը մինչև այսօր ուժի մեջ է: 1992 թվականից ի վեր հակամարտության խաղաղ կարգավորման ուղղությամբ բանակցություններ են տարվում ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան: -0-