Հայաստանը դրական է գնահատել ՆԱՏՕ-ի հետ համագործակցությունը
ԵՐԵՎԱՆ, 22 սեպտեմբեր․/ԱՌԿԱ/. ՆԱՏՕ-ի ԽՎ-ում ՀՀ ԱԺ պատվիրակության ղեկավար և ԱԺ պաշտպանության և անվտանգության մշտական հանձնաժողովի նախագահ Անդրանիկ Քոչարյանը նշել է, որ համագործակցության տարիների ընթացքում Հայաստանը և ՆԱՏՕ-ն իրականացրել են բազմաթիվ ծրագրեր, որոնք ընթացքի մեջ են։
«Միևնույն ժամանակ, մենք չենք կարող անտեսել գլոբալ աշխարհաքաղաքական փոփոխությունները, որոնք ձևավորում են նոր իրողություններ՝ նոր անվտանգային մարտահրավերներով եւ մրցակցային օրակարգով: Այս փոփոխությունները ոչ միայն համարժեք արձագանք են պահանջում, այլև միջազգային անվտանգության ճարտարապետության մեջ առավել խոր ինտեգրում: Այս համատեքստում, հատկապես, ցանկանում եմ ընդգծել Հայաստան-ՆԱՏՕ գործընկերության առանցքային դերը»,- Երևանում ընթացող ՆԱՏՕ-ի խորհրդարանական վեհաժողովի 108-րդ Ռոուզ-Ռոթ սեմինարում այս մասին ասել է ՀՀ ԱԺ պատվիրակության ղեկավար Անդրանիկ Քոչարյանը։
Նա ասել է, որ այս բարեփոխումները դեռևս բավարար մասշտաբի չեն հասել։
«Այնուամենայնիվ, պետք է ընդունել, որ պաշտպանության եւ անվտանգության ոլորտներում թափանցիկության ու հաշվետվողականության մարտահրավերները շատ են՝ պայմանավորված ոլորտի առանձնահատկություններով, ինչը բնական է ազգային անվտանգության նկատառումների տեսանկյունից: Անշուշտ, այս հանգամանքը չպետք է վերածվի հաշվետվողականության բացակայության. մեր օրակարգում առաջնահերթ տեղ պետք է գրավեն այն հարցերը, որոնք վերաբերում են քաղաքացիական վերահսկողության ապահովման ինստիտուցիոնալ մեխանիզմներին, անվտանգության եւ հանրային վերահսկողության իրավունքի համատեղմանը, խորհրդարանականների, հասարակական կազմակերպությունների, անկախ փորձագիտական համայնքի դերին, այս ուղղությամբ ՆԱՏՕ-ի անդամ եւ գործընկեր պետությունների փորձին»,-ասել է Քոչարյանը։
Հայաստանն ու ՆԱՏՕ-ի անդամ երկրներն ունեն Անհատական գործընկերության գործողությունների ծրագիր (IPA), որը ստորագրվել է 2005 թ.-ի դեկտեմբերին։ Այս ծրագրին Հայաստանի մասնակցությունը ենթադրում է պարբերական խորհրդակցություններ ՆԱՏՕ-ի հետ տարածաշրջանային անվտանգության, տարածաշրջանային անվտանգության ռազմավարության մշակման, Հայաստանի ռազմական դոկտրինի մշակման, պաշտպանության և բյուջեի պլանավորման կատարելագործման և այլ հարցերի շուրջ։
