Հայաստանի վարչապետն էկոնոմիկայի նախարարի հետ աշխատելու ցանկություն չունի
ԵՐԵՎԱՆ, 20 սեպտեմբերի. /ԱՌԿԱ/. Հայաստանի վարչապետ Կարեն Կարապետյանը չի ցանկանում աշխատել էկոնոմիկայի ՀՅԴ-ական նախարար Արծվիկ Մինասյանի հետ, գրում է «Հայկական ժամանակ» թերթը։
Ըստ թերթի, նա ցանկանում է ֆինանսատնտեսական բլոկում իր կադրերին նշանակել, որ փոփոխություն իրականացնելիս խնդիրներ չունենա:
«Քաղաքական կուլիսներում, սակայն, խոսվում է, որ նորանշանակ վարչապետը Արծվիկ Մինասյանի հետ նաև անձնական խնդիր ունի այն պատճառով, որ վերջինս տարիներ առաջ հայտարարել է, թե Կարեն Կարապետյանը լավ քաղաքական գործիչ չէ: Վերջինս թեև ժամանակին ինքն էր իր մասին հայտարարում, որ քաղաքական գործիչ չէ, այնուամենայնիվ Արծվիկ Մինասյանի հայտարարությունը նրա մեջ վատ հիշողություններ է թողել»,– գրում է պարբերականը։
Ինչպես նշվում է գրառման մեջ, վարչապետը գտնում է, որ Մինասյանը պրակտիկ նախարար չէ այդ ոլորտում: Բայց ՀՅԴ-ն փորձում է ատամներով պաշտպանել նրան ու իր բոլոր նախարարներին:
Հիշեցնենք, որ անցած շաբաթ ԱԺ ՀՅԴ խմբակցության ղեկավար Արմեն Ռուստամյանը շոու էր անվանել կառավարության նիստի ժամանակ տեղի ունեցած այն միջադեպը, որտեղ Կարեն Կարապետյանը նկատողություն է անում Արծվիկ Մինասյանին։ -0-
