Մոսկվան պատրաստ է քննարկել «Թրամփի ուղի» նախաձեռնությանը մասնակցության հարցը. ՀՀ-ում ՌԴ դեսպան
ԵՐԵՎԱՆ, 6 փետրվարի․/ԱՌԿԱ/․ Մոսկվան պատրաստ է քննարկել Ռուսաստանի հնարավոր մասնակցությունը TRIPP նախագծին, հատկապես, հաշվի առնելով Ռուսաստանի և Հայաստանի համագործակցությունը երկաթուղային ոլորտի զարգացման գործում: Այս մասին «Ռոսիա-24»-ին տված բացառիկ հարցազրույցում հայտարարել է Հայաստանում ՌԴ դեսպան Սերգեյ Կոպիրկինը։
Դեսպանի խոսքով, Ռուսաստանն «ուշադիր հետևում է լայնորեն գովազդվող «Թրամփի ուղին միջազգային խաղաղության և բարգավաճման համար» ամերիկա-հայկական նախագծի շուրջ զարգացումներին»։
Մենք պատրաստ ենք քննարկել այս նախաձեռնությանը միանալու հնարավորությունը, հաշվի առնելով, ի թիվս այլ բաների, Ռուսաստանի և Հայաստանի միջև շատ սերտ համագործակցությունը ՀՀ երկաթուղային հատվածը կոնցեսիոն պայմանագրերի միջոցով աջակցման և զարգացման գործում»,- ասել է նա։
Դեսպանը պարզաբանել է, որ Ռուսաստանն այս գործընթացի առաջնագծում էր՝ թե՛ սահմանային հաղորդակցությունների ապաշրջափակման, այդ թվում՝ Հայաստանի և Ադրբեջանի միջև, թե՛ Հայաստանի և Ադրբեջանի միջև հարաբերությունների կարգավորման ընդհանուր գործընթացում։
«Մենք կարծում ենք, որ այս ոլորտում և, ընդհանրապես, տրանսպորտային ոլորտում կարգավորման առումով համագործակցությունը պետք է զարգանա փոխշահավետ և արդարացի հիմունքներով և, իհարկե, հաշվի առնի տարածաշրջանի բոլոր շահագրգիռ երկրների և նրանց հարևանների շահերը»,- հավելել է նա։
TRIPP նախագծի մասին
«Թրամփի ուղի՝ հանուն միջազգային խաղաղության և բարօրության» (TRIPP) նախագծի շուրջ պայմանավորվածությունը ձեռք է բերվել Հայաստանի, ԱՄՆ-ի և Ադրբեջանի առաջնորդներ Նիկոլ Փաշինյանի, Դոնալդ Թրամփի և Իլհամ Ալիևի միջև և ամրագրվել է 2025 թվականի օգոստոսի 8-ին Վաշինգտոնում ստորագրված եռակողմ հռչակագրով։
Դեկտեմբերի 10-ին Փաշինյանը հայտարարել է, որ անհրաժեշտ ենթակառուցվածքների՝ երկաթուղային և ավտոմոբիլային ճանապարհների, նավթամուղների ու գազամուղների, ինչպես նաև օպտիկամանրաթելային մալուխների զարգացման իրավունքը կստանա հայ-ամերիկյան «TRIPP Company» համատեղ ձեռնարկությունը, որը կգրանցվի Հայաստանում։ Իրականացման և շինարարության փուլը նախատեսվում է սկսել 2026 թվականին։
