Հայաստանի և Ռուսաստանի միջև հարաբերությունները ժամանակի փորձություն են անցել. Նալբանդյան

ԵՐԵՎԱՆ, 12 մարտի. /ԱՌԿԱ/. Հայաստանի և Ռուսաստանի  հարաբերությունները ժամանակի փորձություն են անցել, հայտարարել է ՀՀ ԱԳ նախարար Էդվարդ Նալբանդյանը «Delo» սլովենական օրաթերթին տված հարցազրույցում։

«Հայաստանի և Ռուսաստանի միջև հարաբերությունները ռազմավարական, դաշնակցային են, որոնք անցել են ժամանակի փորձությունը, և հենց դա է բնութագրում մեր երկրների ղեկավարների միջև հարաբերությունները։ Ռուսաստանի հետ մենք ունենք սերտ դաշնակցային հարաբերություններ», – ասել է նա։

Այս կապակցությամբ ՀՀ ԱԳ նախարարը նշել է, որ Ռուսաստանը Հայաստանի հիմնական առևտրային գործընկերն ու ներդրողն է։

«Հարաբերությունները զարգանում են, ամրապնդվում են և ընդլայնվում: Առկա է շատ սերտ համագործակցություն երկու երկրների պաշտպանական գերատեսչությունների միջև: Ինչ վերաբերում է ռուսական ռազմական բազային, ապա այն գտնվում է Հայաստանում միջկառավարական պայմանագրի հիման վրա և հանդիսանում է անվտանգության ապահովման կարևոր գործոններից», – ավելացրել է նա։

Պատասխանելով այն հարցին, թե Արևմուտքում հույս են տածում, որ Գյումրիում տեղի ունեցածը, տնտեսական խնդիրները կգժտեցնեն Հայաստանին և Ռուսաստանին` Նալբանդյանն ընդգծել է, որ «դրանք անլուրջ հույսեր են»։

ԱՎԾ–ի տվյալների համաձայն` Ռուսաստանի հետ Հայաստանի արտաքին առևտրաշրջանառությունը 2014 թ.–ին կազմել է 1 402,7 մլն դոլար` տարվա ընթացքում ավելանալով 3,2 տոկոսով։ Միաժամանակ հանրապետության արտաքին համախառն առևտրաշրջանառությունից  Ռուսաստանի հետ Հայաստանի արտաքին առևտրաշրջանառության մասնաբաժինը հաշվետու ժամանակահատվածում կազմել է 23,7 տոկոս (առաջին տեղ)։–0–