Նիկոլ Փաշինյանը շնորհավորել է Յուլիա Սվիրիդենկոյին Ուկրաինայի վարչապետի պաշտոնում նշանակվելու առիթով
ԵՐԵՎԱՆ, 24 հուլիսի./ԱՌԿԱ/. Վարչապետ Նիկոլ Փաշինյանը շնորհավորական ուղերձ է հղել Ուկրաինայի վարչապետ Յուլիա Սվիրիդենկոյին՝ վարչապետի պաշտոնում նշանակվելու առիթով:
Իր ուղերձում նա նշել է, որ Հայաստանը մեծապես կարևորում է Ուկրաինայի հետ հարաբերությունների հետագա ընդլայնումն ու խորացումը:
«Համոզված եմ, որ համատեղ ջանքերի շնորհիվ հնարավոր է Հայաստանի և Ուկրաինայի միջև ապահովել համագործակցության ներուժի իրացում՝ կարևորելով առևտրատնտեսական և հումանիտար ոլորտներում համագործակցության ընդլայնումը։ Լիահույս եմ, որ Հայաստանի Հանրապետության և Ուկրաինայի միջև տնտեսական համագործակցության հարցերով միջկառավարական համատեղ հանձնաժողովի հետևողական աշխատանքը կարող է ապահովել փոխշահավետ համագործակցության որակապես նոր մակարդակ՝ ստեղծելով բարենպաստ պայմաններ հարաբերությունների զարգացման և հեռանկարային ծրագրերի կյանքի կոչման համար»,- նշել է վարչապետը։
Փաշինյանը Սվիրիդենկոյին մաղթել է առողջություն և հաջողություն իր բոլոր նախաձեռնություններում, իսկ Ուկրաինայի ժողովրդին՝ խաղաղություն և բարօրություն։
ՀՀ վարչապետն այժմ գտնվում է ՌԴ-ում, որտեղ նա կմասնակցի Բնության և շրջակա միջավայրի պաշտպանությանը նվիրված միջազգային համաժողովին:
