Փաշինյանը դրական է գնահատել Ալիևի հետ երկխոսության սկիզբը
ԵՐԵՎԱՆ, 11 ապրիլի. /ԱՌԿԱ/. Հայաստանում տեղի ունեցած ժողովրդավարական բարեփոխումները նոր երանգներ են հաղորդել ղարաբաղյան կարգավորման մասին Երևանի պատկերացումներին, հինգշաբթի ասել է վարչապետ Նիկոլ Փաշինյանը Եվրոպայի խորհրդի խորհրդարանական վեհաժողովի նիստում։
«Ղարաբաղյան հակամարտությունը շարունակում է լուրջ խնդիր մնալ Հայաստանի ւ մեր ողջ տարածաշրջանի համար։ Ինչպես և ցանկացած այլ ժողովրդավարական կառավարություն, Հայաստանի կառավարությունը հավատարիմ է բացառապես խաղաղ կարգավորմանը»,– ասել է նա։
Փաշինյանը կարևորել է Ադրբեջանի նախագահ Իլհամ Ալիևի հետ կառուցողական և դրական երկխոսության սկիզբը, ափսոսանք հայտնելով, որ երկու երկրների առաջնորդների միջև երկխոսությունը բավարար չէ հարցը լուծելու համար։
«Շատ կարևոր է, որ երկխոսություն սկսվի նաև հասարակությունների միջև և որ մենք պատրաստենք մեր ժողովուրդները խաղաղության, և ոչ պատերազմի»,– նշել է նա։
Հայաստանի կառավարության ղեկավարը հիշեցրել է, որ բազմիցս ելույթ է ունեցել հայերի և ադրբեջանցիների միջև երկխոսություն հաստատելու նախաձեռնությամբ սոցցանցերում, սակայն նրանց շփումը շարունակվում է ատելության լեզվով, չնայած, որ հակամարտության երեսուն տարիների ընթացքում կարելի էր գտնել այն պատճառները, որոնք խանգարում են փոխըմբռնման։
Նա ընդգծել է, որ հայկական կողմն արդեն քայլ է արել բանակցությունների համար բարենպաստ մթնոլորտի ձևավորմանը, հայտարարելով, որ լուծումը պետք է ընդունելի լինի Հայաստանի և Արցախի, ինչպես նաև Ադրբեջանի ժողովուրդների համար։
«Ցավոք, մենք առայժմ նման խոսքեր չենք լսում Ադրբեջանից։ Հուսամ` այս ամբիոնից հնչած կոչն ադեկվատ արձագանք կգտնի ադրբեջանական հասարակությունում»,– ասել է Փաշինյանը։
