Պուտինը և Ալիևը հեռախոսազրույց են ունեցել. քննարկվել են հայ-ադրբեջանական հարաբերություններին առնչվող հարցեր
ԵՐԵՎԱՆ, 28 օգոստոսի․/ԱՌԿԱ/. ՌԴ նախագահ Վլադիմիր Պուտինը հեռախոսազրույց է ունեցել Ադրբեջանի նախագահ Իլհամ Ալիևի հետ։ Այս մասին տեղեկանում ենք Կրեմլի տարածած հաղորդագրությունից։
Երկրների ղեկավարները գոհունակություն են հայտնել Ռուսաստանի նախագահի՝ վերջերս Ադրբեջան կատարած պետական այցի արդյունքների կապակցությամբ։
Նշվում է, որ բանակցությունների ընթացքում ձեռք բերված պայմանավորվածությունների հետևողական իրականացումը կնպաստի ռուս-ադրբեջանական դաշնակցային և գործընկերային հարաբերությունների հետագա խորացմանը։
Քննարկում է շարունակվել ներկայում Անդրկովկասում տիրող իրավիճակի տարբեր ասպեկտների, այդ թվում՝ ադրբեջանա-հայկական հաշտության պայմանագրի նախապատրաստման հարցերի, սահմանի սահմանազատման ու սահմանագծման և երկրների միջև տրանսպորտային հաղորդակցությունների ապաշրջափակման շուրջ։
«Այդ կապակցությամբ ռուսական կողմը հաստատել է իր պատրաստակամությունը հետագայում ևս շարունակելու Բաքվին և Երևանին հնարավոր աջակցություն ցուցաբերել համապատասխան փոխընդունելի լուծումներ մշակելու համար։
Պայմանավորվածություն է ձեռք բերվել շարունակել անձնական շփումները»,- նշված է հաղորդագրության մեջ։
Հիշեցնենք, որ օրերս ՌԴ նախագահը ՀՀ վարչապետին տեղեկացրել էր Ադրբեջան կատարած իր այցի տպավորությունների մասին, որը տեղի էր ունեցել օգոստոսի 18-ին։
