Թրամփի հետ հանդիպմանը Փաշինյանի նախաձեռնությամբ քննարկվել է Ադրբեջանում անազատության մեջ գտնվող հայրենակիցների վերադարձի հարցը․ Նազելի Բաղդասարյան
11.08.2025,
10:18
Նազելի Բաղդասարյանն անդրադարձել է Ադրբեջանում անազատության մեջ գտնվող հայերի հարցին
ԵՐԵՎԱՆ, 11 օգոստոսի․/Նովոստի–Արմենիա/. Համացանցում անհեթեթության հասնող ենթադրություններ են շրջանառվում, թե իբր վարչապետ Փաշինյանը Վաշինգտոնում դեմ է արտահայտվել Ադրբեջանում անազատության մեջ գտնվող մեր հայրենակիցների կամ նրանց մի մասի վերադարձին, գրել է Փաշինյանի մամուլի քարտուղար Նազելի Բաղդասարյանը Facebook–յան իր էջում։
«Վարչապետը բազմիցս նշել է, որ ՀՀ ներկայացուցիչները տարբեր ձևաչափերի իրենց հանդիպումներում շարունակաբար բարձրացնում են այդ հարցը և փնտրում լուծումներ», – նշել է Բաղդասարյանը։
Նրա խոսքով, ԱՄՆ նախագահ Դոնալդ Թրամփի հետ հանդիպմանը հարցը քննարկման առարկա է դարձել հենց վարչապետ Փաշինյանի նախաձեռնությամբ։ Ընդ որում, վարչապետը հարցի մասին խոսել է ամբողջության մեջ և ոչ թե մասնակի։
