Հայաստանի վարչապետը հանձնարարել է Սոցնախարարությանը ստուգումներ կազմակերպել
ԵՐԵՎԱՆ, 26 հունվարի. /ԱՌԿԱ/. Հայաստանի վարչապետ Կարեն Կարապետյանը հրահանգել է լրջորեն զբաղվել Աշխատանքի և սոցիալական ապահովման նախարարությամբ, գրում է «Ժողովուրդ թերթը»։
«Արդեն հինգ տարի է` աշխատանքի և սոցիալական նախարարի պաշտոնը զբաղեցնում է հանրապետական Արտեմ Ասատրյանը։ Պաշտոնավարման հինգ տարիների ընթացքում տարբեր գերատեսչություններում պարբերաբար կոռուպցիոն սկանդալներ են ծագել, դրանց անմիջական մասնակիցները կալանավորվել են, անուղղակի մասնակիցները հրաժարական են տվել։ Իսկ ահա նախարարը շարունակում է մնալ իր պաշտոնում»,– ասվում է թերթում։
Հրապարակման հեղինակը նշում է, որ հերթական կոռուպիցոն սկանդալից հետո մեղավոր են դառնում բոլորը, բացի ոլորտի գլխավոր պատասխանատուից։
Օրեր առաջ վարչապետի որոշմամբ, պաշտոնից ազատվել է աշխատանքի և սոցապահովման փոխնախարար Ֆիլարետ Բերիկյանը, ով այդ պաշտոնը զբաղեցնում էր երկար տարիներ` կարգավորելով մանկատների և ծերանոցների աշխատանքը։ -0-
