2017 թ. հունվար-հուլիսին ՀՀ օդանավակայաններում ուղևորահոսքն աճել է 28 տոկոսով
ԵՐԵՎԱՆ, 7 օգոստոսի. /ԱՌԿԱ/. ՀՀ երկու օդանավակայանների ուղևորահոսքը 2017 թ–ի հունվար-հուլիս ամիսներին կազմել է 1,373,856 մարդ, որը 28 տոկոսով գերազանցում է նախորդ տարվա նույն ամիսների ցուցանիշը:
ՀՀ քաղավիացիայի գլխավոր վարչության մամուլի հաղորդագրության համաձայն, 2017 թ–ի հուլիս ամսին Երևանի «Զվարթնոց» օդանավակայանում ուղևորահոսքը կազմել է 270 751 մարդ՝ 19 տոկոսով գերազանցելով նախորդ տարվա նույն ամսվա ցուցանիշը: Այս տարվա հունվար-հուլիս ամիսներին, 2016 թ–ի նույն ամիսների հետ համեմատած, «Զվարթնոց» օդանավակայանում գրանցվել է ուղևորհոսքի 24,7 տոկոս աճ:
«Զվարթնոց» օդանավակայանում 2017 թ–ի առաջին 7 ամիսներին բեռնափոխադրումը կազմել է 12 708 տոննա ապրանք, որը 59,7 տոկոսով գերազանցում է նախորդ տարվա նույն ժամանակահատվածի ցուցանիշը:
2017 թ–ի հուլիս ամսին Գյումրու «Շիրակ» օդանավակայանում ուղևորահոսքը կազմել է 9098 մարդ՝ նախորդ տարվա նույն ամսվա ցուցանիշը գերազանցելով 15063 տոկոսով: «Շիրակ» օդանավակայանում 2017 թվականի հունվար-հուլիս ամիսներին ուղևորահոսքը 526.6 տոկոսով աճել է նախորդ տարվա նույն ամիսների հետ համեմատած:
«Զվարթնոց» և «Շիրակ» օդանավակայաններում 2017 թ–ի հունվար-հուլիս ամիսներին, նախորդ տարվա նույն ամիսների հետ համեմատած, 24.2 տոկոսով աճ են գրանցել նաև թռիչք- վայրէջքները:-0-
