2026 թ.-ից կակտիվանա առողջության ապահովագրական փաթեթը. ԱԺ-ն ընդունեց նախագիծը
ԵՐԵՎԱՆ, 17 դեկտեմբերի․/ԱՌԿԱ/․ ՀՀ ԱԺ-ն երկրորդ ընթերցմամբ և ամբողջությամբ ընդունեց առողջության համընդհանուր ապահովագրության ներդրման վերաբերյալ օրենքների նախագծերի փաթեթը։
Ինչպես նշեց առողջապահության նախարար Անահիտ Ավանեսյանը, 2026 թվականի հունվարի 1-ից կակտիվանա ապահովագրական փաթեթը,իսկ առաջին վճարման պարտավորությունը կլինի մինչև հունվարի 20-ը:
Նախարարի խոսքով՝ նոյեմբերը կհամարվի ապահովագրավճարների հաշվարկման առաջին ամիսը, քանի որ դեկտեմբերը բացառիկ ամիս է աշխատավարձերի և պարգևավճարների լրացուցիչ հաշվարկի համար։
«Մեր նպատակն է, որ մարդկանց ճնշող մեծամասնությունը 2029 թ.-ին հասանելիություն ունենա այս համակարգին և ապահովվի անհրաժեշտ առողջապահական առաջնային ծառայություններով։ Օրենքը նախատեսում է ապահովագրական համակարգի փուլային ներդրում՝ երեք տարվա ընթացքում», - ասաց Ավանեսյանը։
Նրա խոսքով՝ ապահովագրությունը կֆինանսավորի առաջնային բուժօգնությունը, շտապ օգնությունը և ստացիոնար բուժումը։ «Ծառայությունների կոնկրետ ցանկը կհաստատվի կառավարության որոշմամբ», - հավելեց Ավանեսյանը։
Նախարարը նշեց, որ ապահովագրությունը համընդհանուր է և կներառի բոլոր ՀՀ քաղաքացիներին, սակայն այն չի ծածկի բոլորի բժշկական կարիքների ամբողջ շրջանակը։
«Այն ուղղված է հիվանդացության և մահացության հիմնական շարժիչ գործոնները հանդիսացող վիճակների և հիվանդությունների մեղմմանը, ինչպես նաև բուժման լավագույն արդյունքների ապահովմանը», - ընդգծեց Ավանեսյանը։
