Հայաստանում կստեղծվի թմրամիջոցների ապօրինի շրջանառության դեմ պայքարի միջգերատեսչական հանձնաժողով

ԵՐԵՎԱՆ, 1 փետրվարի․/ԱՌԿԱ/․ ՀՀ կառավարությունը հինգշաբթի կայացած նիստում որոշել է թմրամիջոցների և հոգեմետ նյութերի ապօրինի շրջանառության դեմ պայքարի միջգերատեսչական հանձնաժողով ստեղծել։

Քննչական կոմիտեի ղեկավար Արգիշտի Քյարամյանի խոսքով՝ 2023 թվականին հարուցվել է 4025 քրեական գործ, մեղադրանք է առաջադրվել 1063 քաղաքացու, որոնցից 277-ը կալանավորվել է։ Նա նաև հայտնեց, որ բացահայտվել են թմրամիջոցների ապօրինի շրջանառության մեջ ներգրավված ավելի քան 150 Telegram ալիքներ, որոնցից 30-ն արգելափակված է, նաև հայտնաբերվել է 8 լաբորատորիա։ 

Ինչ վերաբերում է փողերի լվացման դեմ պայքարին, ապա նա նշեց, որ մեղադրանք է առաջադրվել ընդհանուր 5,1 մլրդ դրամի գործերով, որից 3 մլրդ դրամի գործերն ուղարկվել են դատարան։

Քյարամյանը խոսեց նաև թմրամիջոցների ապօրինի շրջանառության դեմ պայքարի նոր մեթոդների մասին և զեկուցեց առաջին դրական արդյունքների մասին։

ՆԳՆ պետ Վահե Ղազարյանն իր հերթին հայտնեց, որ 2023 թվականին արձանագրվել է առցանց թմրամիջոցների ապօրինի շրջանառության 489 դեպք, որից 128-ը՝ իրացում, իսկ 361-ը՝ ձեռք բերում։ 

Վարչապետ Նիկոլ Փաշինյանն իր հերթին ընդգծեց, որ հատուկ ուշադրություն պետք է դարձնել ֆինանսական հոսքերին, մասնավորապես՝ կրիպտոարժույթի միջոցով։-0-