Միասնական տոմսային համակարգի ներդրման ժամկետները կարող են երկարաձգվել
ԵՐԵՎԱՆ, 17 հունիսի․/ԱՌԿԱ/․ Երևանի քաղաքապետ Տիգրան Ավինյանն այսօր քաղաքապետարանում կազմակերպված գործակարգավարական նիստի ժամանակ անդրադարձել է մայրաքաղաքի համար նոր ավտոբուսների խմբաքանակի ձեռքբերման աշխատանքներին։
Փոխքաղաքապետ Սուրեն Գրիգորյանը հայտնել է, որ ժամանակացույցով նախատեսված է հոկտեմբերի վերջ-նոյեմբերի սկզբին, սակայն աշխատում են, որ դրանք ավելի շուտ լինեն Երևանում։
Միաժամանակ Ավինյանն անդրադարձել է միասնական տոմսային համակարգի ներդրման գործընթացին։
«Միասնական տոմսային համակարգի ներդրումը տեղի է ունենում, երբ նոր ավտոբուսները գալիս և մտնում են գիծ»:
Քաղաքապետը հանձնարարել է ներկայացնել ավագանու որոշման նախագիծ, որով կերկարաձգվի միասնական տոմսային համակարգի ներդրման ժամկետը մեկ կամ երկու ամսով. «Որպեսզի մեր խոստումը հստակ կատարված լինի»,- ասել է նա։
Սուրեն Գրիգորյանն իր հերթին նշել է, որ արդեն պատրաստել են նախագիծը։
