Քննարկվում է արտակարգ դրությունը երկարաձգելու հնարավորությունը. Մանե Գևորգյան

ԵՐԵՎԱՆ, 12 մայիսի./ԱՌԿԱ/. ՀՀ կառավարությունը քննարկում է մայիսի 14–ից հետո արտակարգ դրությունը երկարաձգելու հնարավորությունը, ինչպես նաև մի շարք սահմանափակումների ներդրումը կորոնավիրուսի իրավիճակի կապակցությամբ, հաղորդում է «Նովոստի–Արմենիա» գործակալությունը` հղում անելով ՀՀ վարչապետի մամուլի քարտուղար Մանե Գևորգյանին։ 

Հայկական ԶԼՄ–ները հայտնում են, որ կառավարությունը մտադիր է երկարաձգել արտակարգ դրության ռեժիմը և սահմանել փողոցում դիմակներ կրելու պարտաադիր պայման։ 

«Սահմանափակումների  հնարավոր երկարաձգման հարցն այսօր դեռ քննարկվում է։ Վերջնական որոշումը կհրապարակվի մայիսի 14–ին` ավելի վաղ հայտարարված արտակարգ դրության ժամկետի ավարտի օրը», – ասել է Գևորգյանը։

Նրա խոսքով, դեռևս վաղ է խոսել նոր սահմանափակումների ներդրման մասին, դա մասնավորապես վերաբերում է փողոցում դիմակներ կրելու պարտադիր պայմանին, ինչպես նաև հասարակական տրանսպորտի սահմանափակման հնարավոր վերացմանը։

«Քանի որ վերջնական որոշում դեռ չկա, ապա այդ ողջ տեղեկատվությունը չի կարող ստույգ լինել։ Կառավարությունը քննարկում է բոլոր տարբերակները», – ասել է վարչապետի մամուլի քարտուղարը։ 

Հայաստանում մայիսի 12-ի, ժամը 11:00-ի դրությամբ հաստատվել է կորոնավիրուսային հիվանդության ընդհանուր 3538 դեպք, որոնցից 1430-ն` առողջացած, 47-ը` մահվան ելքով: Կորոնավիրուսային հիվանդությամբ այս պահին փաստացի բուժում է ստանում 2042 պացիենտ:-0-