Շուրջ 2 մլրդ դրամ կուղղվի դպրոցների և մանկապարտեզների գույքային բարելավման համար

ԵՐԵՎԱՆ, 24 նոյեմբերի./ԱՌԿԱ/. Կառավարությունը գումար է հատկացրել 96 դպրոցի շենքային պայմանների, 114 դպրոցի և 8 մանկապարտեզի գույքային բարելավման համար:

2022 թվականի պետական բյուջեով կապիտալ ծրագրերին հատկացված միջոցներից կատարվել է վերաբաշխում.

• 1 մլրդ 933 մլն դրամ՝ 96 դպրոցի շենքային պայմանների բարելավման և 101 դպրոցի գույքային հագեցվածության համար,
• 353 մլն 830.7 հազար դրամ՝ 13 դպրոց գույքով ապահովելու համար,
• 154 մլն 674 հազար դրամ՝ 8 մանկապարտեզի գույքի ձեռքբերման համար:

«Այս աշխատանքները հնարավորություն են տալիս լուծելու մարզպետարանների կողմից գույքագրված դպրոցներում առկա հրատապ խնդիրները՝ ջեռուցման, տանիքի և սանհանգույցների վերանորոգման տեսանկյունից, որը խիստ անհրաժեշտ է ուսումնական բնականոն գործընթացն ապահովելու համար: Մյուս կողմից՝ սա նաև հնարավորություն է այն դպրոցներում, որոնց շենքերն ամրացման կարիք չունեն և բավարար վիճակում են, իրականացնելու անհրաժեշտ վերանորոգման և գույքով համալրման աշխատանքներ՝ այդ դպրոցների միջավայրը համապատասխանեցնելով Կառավարության «300 դպրոց, 500 մանկապարտեզ» ծրագրի համար նախատեսված չափանիշներին»,- ասել է նախարար Վահրամ Դումանյանը:-0-