Թիվ 38 երթուղին հնարավոր է շուտով չսպասարկվի. թերթ
ԵՐԵՎԱՆ, 19 դեկտեմբերի./ԱՌԿԱ/. Թիվ 38 երթուղին հնարավոր է շուտով չսպասարկվի։
Երթուղին շահագործող կազմակերպության տնօրենը գրավոր դիմել է քաղաքապետարան և հայտնել, որ ֆինանսական խնդիրների ու վարորդների սակավության պատճառով չի կարող աշխատել, գրում է «Հայկական ժամանակը»։
Երևանի քաղաքապետարանի տրանսպորտի վարչության պետի ԺՊ Էդգար Գալստյանը թերթի հետ զրույցում նշել է, որ սահմանված կարգի համաձայն` դիմելուց 50 օր հետո միայն տվյալ երթուղին շահագործող ընկերությունը հնարավորություն ունի այն չսպասարկել։
Թիվ 38 միկրոավտոբուսային երթուղին սկսվում է Քանաքեռ–Զեյթուն վարչական շրջանի «Արթմեդ» հիվանդանոցի մոտից, վերջնակետը Էրեբունի զանգվածի ՋԷԿ–ի հատվածն է։
«Բավականին երկար ճանապարհ գրունտային վիճակում է, որտեղ բնակչությունն էլ է կտրված հիմնական ճանապարհահատվածից», – նկատել է Գալստյանը։
Նրա խոսքով, քաղաքապետարանը բանակցում է ընկերության հետ։ Եթե արդյունքի չհասնեն, կփորձեն այլ երթուղիներ սպասարկողների հետ պայմանավորվել։–0–
