ՀՀ–ում պարտադիր կուտակային բաղադրիչի ներդրման ժամկետը չի երկարացվի
ԵՐԵՎԱՆ, 3 հոկտեմբերի. /ԱՌԿԱ/. ՀՀ–ում պարտադիր կուտակային համակարգի ներդրման ժամկետները չեն վերանայվի, երեքշաբթի ՀՀ ԱԺ նիստի ժամանակ ասաց ՀՀ ֆինանսների փոխնախարար Կարեն Թամազյանը։
Փոխնախարարը հիշեցրեց, որ ըստ գործող օրենսդրության` վերջին տեղափոխված ժամկետներից հետո պարտադիր կուտակային համակարգի լիարժեք ներդրումը նախատեսված է 2018 թ.–ի հուլիսի 1–ից։
«Ըստ օրենքի` 2018 թ.–ի հուլիսին համակարգի բոլոր շահառուները կմիանան պարտադիր կուտակային համակարգին, և կառավարությունը չի նախատեսում փոփոխություններ անել այս դրույթում», – ասաց Թամազյանը։
Նրա խոսքով, օրենքը պետք է իրագործվի նախատեսված ժամկետներում։
Կենսաթոշակային պարտադիր կուտակային համակարգը ներդրվել է Հայաստանում 2014 թ.–ի հունվարի 1–ից և գործում է 1974 թ.–ի հունվարի 1–ից հետո ծնված բոլոր քաղաքացիների համար։
«Կուտակային կենսաթոշակների մասին» օրենքի մի շարք դրույթները ՀՀ սահմանադրությանն անհամապատասխան ճանաչելուց հետո պարտադիր բաղադրիչը գործում է միայն բյուջետային աշխատողների համար։ Մնացած քաղաքացիների համար օրենսդրական կարգով նախատեսվում էր ավելի վաղ կատարված կենսաթոշակային վճարների վերադարձ։
ՀՀ ԱԺ–ն այս տարվա մայիսի 12–ին երկրորդ և վերջնական ընթերցմամբ ընդունեց փոփոխություններ «Կուտակային կենսաթոշակների մասին» օրենքում, որոնք նախատեսում են պարտադիր բաղադրիչի ներդրման ժամկետի երկարաձգում մինչև 2018 թ.–ի հուլիսի 1–ը։–0–
